Ótken táýlikte Qazaqstan joldarynda 750 adam qutqaryldy

NUR-SULTAN. QazAqparat - Búgingi tańda elde avtomobıl joldarynyń 95 ýchaskesi jabyq. Aýa raıynyń qolaısyzdyǵyna baılanysty Aqmola, Aqtóbe, Shyǵys Qazaqstan, Qaraǵandy, Qostanaı oblystary men Nur-Sultanda jedel shtabtar qurylyp, jumys isteýde, dep habarlaıdy QR IIDM baspasóz qyzmeti.

Shtabtardyń quramynda QR IIDM Avtomobıl joldary komıtetiniń, ««QazAvtoJol» UK» AQ, QR ІІM Tótenshe jaǵdaılar men Ákimshilik polıtsııa komıtetteriniń jáne Ulttyq gvardııa qyzmetkerleri bar.

Ótken táýlikte daýyldy eskertý 13 óńirde jarııalanyp, respýblıkalyq mańyzy bar avtomobıl joldarynyń 61 ýchaskesi, oblystyq jáne aýdandyq mańyzy bar avtomobıl joldarynyń 34 ýchaskesi jabyldy. Respýblıkalyq mańyzǵa ıe avtomobıl joldarynyń 3 ýchaskesinde júk jáne jolaýshylar kólikteriniń qozǵalysyna shekteý qoıylǵan bolatyn.

Aıta ketý kerek, qutqarýshylar men jol qyzmetteriniń jumyskerleri qar qursaýynan 750 adamdy qutqardy. Olardyń 82-si – bala. Qaýipsiz jerge shyǵarylǵan 447 adamnyń ishinde 11 bala bar. Jalpylaı alǵanda, 1380 avtokólikke kómek kórsetildi.

Respýblıkalyq mańyzǵa ıe «Nur-Sultan – Shýchınsk» jolynda eki baǵytta da kólik quraldarynan quralǵan uzyn-sonar keptelistiń qalyptasýyna oraı Aqmola oblysynda asa kúrdeli jaǵdaı oryn aldy. ««QazAvtoJol» UK» AQ Aqmola oblysynyń ákimdigimen birlesip, 26. 01. 2020 saǵat 15:00-de eki baǵyttaǵy kólik quraldarynyń legin arnaıy tehnıkanyń, patrýl kóliginiń súıemeldeýimen ótkizý týraly sheshim qabyldady.

Sondaı-aq, tótenshe jaǵdaılar men oqıǵalar qaýpi týraly halyqty eskertý maqsatynda azamattardyń uıaly telefondaryna 224 SMS-habarlama, «Dármen» mobıldi qosymshasy arqyly 367 habarlama jiberilip, «qaýyrt jeli» telefonyna 155 qońyraý kelip tústi.

Avarııalyq-qutqarý jumystaryna barlyǵy 913 adam men tehnıkanyń 607 birligi jumyldyryldy.