Ótken táýlikte Qazaqstan óńirlerinde órtterde 2 adam mert boldy, tórteýi zardap shekti

Bul týraly QR TJM-niń baspasóz qyzmetinen habarlady.

Máselen, keshe saǵat 20.03-te Astana qalasynyń «Saryarqa» aýdanynda jekemenshik úı órtendi. Órt bir saǵattan keıin sóndirildi. Tilsiz jaýdy aýyzdyqtaýǵa TJM Astana qalalyq TJD órtke qarsy qyzmetiniń 15 adamy men 3 tehnıkasy, QR TJM «Apatty medıtsına ortalyǵy» MM-niń 3 adamy men 1 tehnıkasy jumyldyryldy. Órt ornynda 75 jastaǵy áıeldiń máıiti tabyldy. Jalyndy sóndirý kezinde ıis tıip ýlanǵan 39 jastaǵy er adam aýrýhanaǵa jetkizildi.

Juma kúni saǵat 19.58-de Taraz qalasyndaǵy bes qabatty turǵyn úıdiń ekinshi qabatyndaǵy páter otqa orandy. Órt 37 mınýttan keıin sóndirildi. Ony aýyzdyqtaýǵa TJM Jambyl oblystyq TJD órtke qarsy qyzmetiniń 7 adamy men 2 tehnıkasy jumyldyryldy. Órttiń saldarynan 76 jastaǵy áıel kúıik shalý jáne ıis tıip ýlaný belgilerimen aýrýhanaǵa jetkizildi.

Keshe saǵat 11.58-de SQO Maǵjan Jumabaev aýdanynyń Zolotaıa Nıva aýylynda jer úı órtendi. Soltústik Qazaqstan oblystyq TJD órtke qarsy qyzmeti (4 adamy men 1 tehnıkasy) jalynmen úsh saǵat kúresti. Oqıǵa ornynda 4 jasar balanyń máıiti tabyldy.

Sondaı-aq juma kúni saǵat 02.35-te Jambyl oblysynyń Baızaq aýdanynda «Densaýlyq» saıajaılyq alqabynda úı jalyndady. Tilsiz jaýdy adamdar óz kúshterimen sóndirdi. Qutqarýshylar shaqyrylǵan joq. Órttiń saldarynan 29 jastaǵy er adam men 23 jastaǵy qyz kúıik jaraqattaryn alyp, aýrýhanaǵa jetkizildi.