Ótken táýlikte Qaraǵandy joldarynda 48 jol-kólik oqıǵasy boldy
QARAǴANDY. QazAqparat – Qaraǵandy oblysynda kún raıynyń kúrt nasharlaýyna baılanysty ótken táýlikte 50-den astam jol-kólik oqıǵasy tirkeldi. Kólik apatynan 12 adam zardap shekti, dep habarlaıdy QazAqparat tilshisi.
Ótken táýlikte Qaraǵandy oblysynyń basym bóliginde aýa raıy kúrt nasharlady. Óńirdiń ortalyǵy men soltústiginde qatty boran men kóktaıǵaq boldy. Osyǵan baılanysty joldarda 50-den astam apat boldy.
«Ótken táýlikte oblys ortalyǵynda 48 jol-kólik oqıǵasy tirkeldi, sonyń nátıjesinde 12 adam jeńil dárejede jaraqat aldy. Qala syrtyndaǵy joldarda 6 jol-kólik oqıǵasy boldy. Baqytymyzǵa oraı, ol apattardan eshkim zardap shekken joq», - dedi Qaraǵandy oblysy Polıtsııa departamentiniń bólim bastyǵy Qýanysh Zárýbaev.
Jol polıtsııasy qyzmetkerleri júrgizýshilerdi joldarda qashyqtyq pen jyldamdyq rejımin saqtaýǵa shaqyrady. Sondaı-aq, polıtsııa jaıaý júrginshiler ótkeliniń janynda jyldamdyqty báseńdetýdi jáne kólik dóńgelekterine qysqy shına taǵý qajetteligi týraly eske salady.
