Ótken táýlikte qar qursaýynan 459 adam qutqaryldy - QR ІІM TJK
ASTANA. QazAqparat - Ótken táýlikte Qazaqstan Respýblıkasy ІІM Tótenshe jaǵdaılar komıtetiniń aýmaqtyq organdary jergilikti atqarýshy organdar bólimshelerimen birlese otyryp, qar qursaýynan 459 adamdy qutqardy jáne 174 birlik tehnıkany evakýatsııalady, dep habarlaıdy atalǵan vedomstvonyń baspasóz qyzmeti.
Aqmola, Pavlodar, Soltústik Qazaqstan oblystarynda izdestirý jáne avarııalyq-qutqarý jumystary júrgizildi.
Eń kóp júrgizilgen izdestirý-qutqarý jumystary Soltústik Qazaqstan oblysynda boldy. Máselen, Ǵ. Músirepov atyndaǵy, M. Jumabaev aýdandarynda, sondaı-aq Aqqaıyń, Aıyrtaý, Shal aqyn, Esil, Qyzyljar jáne Taıynsha aýdandarynda qar qursaýynan 258 adam jáne 91 birlik tehnıka evakýatsııalandy.
Jarqaıyń, Ereımentaý, Esil, Jaqsy jáne Zerendi aýdandaryndaǵy Aqmola oblysynyń avtojoldarynda 167 adam jáne 71 birlik tehnıka qutqarylyp, evakýatsııalandy.
Pavlodar (Jelezın, Ýspen aýdandary) jáne Qostanaı (Sarykól aýdany) oblystarynda 34 adam jáne 14 birlik tehnıka evakýatsııalandy.
Avtojoldardyń qar basýy múmkin ýchaskelerine qorǵaý qalqandary ornatyldy, barlyq qajetti qar tazalaıtyn jáne jol tehnıkasy, 949 jylytý pýnkti ázirlikke keltirildi, 80 myń tekshe kóktaıǵaqqa qarsy materıaldar daıyndaldy, 81 órt sóndirý jáne qalpyna keltirý poıyzdary ázirlikke keltirildi.
Komıtettiń aýmaqtyq bólimsheleri elimizdiń avtojoldarynda aýa raıy nasharlaǵan ýaqytta halyqqa SMS-habarlama taratý, radıo, telearna, sondaı-aq ınternet-resýrs arqyly habarlaıdy.
Sonymen qatar búgingi kúni avtojoldardyń asa avarııalyq-qaýipti ýchaskelerinde 40 kúrejol medıtsınalyq-qutqarý pýnkti jumys isteıdi, olar medıtsınalyq jabdyqtarmen, sý saqtaýǵa arnalǵan ydyspen jáne janar-jaǵarmaı materıaldarymen jaraqtalǵan.
Atalmysh kúrejol medıtsınalyq-qutqarý pýnktteri Qazaqstan Respýblıkasy Prezıdentiniń «Salamatty Qazaqstan» baǵdarlamasy boıynsha tapsyrmasyn oryndaý aıasynda salyndy.
Qys mezgilinde jolǵa shyǵardyń aldynda Sizge avtojoldardyń jaǵdaıy týraly qosymsha aqparatty Іshki ister departamentteriniń Jol-kólik basqarmalary, «Qazavtojol» respýblıkalyq memlekettik kásipornynyń kezekshi qyzmetterinen, oblystar, Astana jáne Almaty qalalary Tótenshe jaǵdaılar departamentteriniń Biryńǵaı kezekshilik-dıspetcherlik qyzmetterinen «112» telefony boıynsha alýǵa bolady.
