Ótken táýlikte elordanyń jedel járdem stansasyna 4 myńnan astam qońyraý túsken
NUR-SULTAN. QazAqparat – Nur-Sultan qalasynda ınfektsııalyq arýhanalarmen birge jedel járdem qyzmeti de shekten tys júktememen jumys istep jatyr, dep habarlaıdy QazAqparat tilshisi.
Nur-Sultan qalasy qoǵamdyq densaýlyq saqtaý basqarmasynyń basshysy Tımýr Muratovtyń aıtýynsha, elordalyqtardan táýlik saıyn koronavırýs indetimen baılanysty 300-den astam qońyraý túsip jatyr.
«Ásirese, azamattar ózderin-ózi úı jaǵdaıynda emdelýine baılanysty juqpaly aýrýlar aýrýhanalaryna kovıdtiń aýyr túrimen túsip jatqanyn atap ótkim keledi. Medıtsınalyq kómekke birden júginbeý, dárigerdiń qaraýynsyz tikeleı antıkoagýlıanttarmen emdelgen naýqastardy reanımatsııa bólimshesine aýystyrýǵa týra keledi», - deıdi maman.
Basqarma basshysy turǵyndardan túsetin shaqyrtýlarǵa úlgerýdiń ózi problemaǵa aınalǵanyn aıtady.
«Qazirgi ýaqytta jedel járdem brıgadalary men mobıldi brıgadalardyń jumysynda da úlken júkteme baıqalyp tur. Tek ótken táýlikte jedel járdem stantsııasyna túsken qońyraýlar sany – 4 myńnan asty. Shaqyrtýlar sany – 2 300. KVI boıynsha qońyraýlar sany - táýligine 300-den asyp otyr», - dedi Tımýr Muratov.
Sondaı-aq, ol PTR test arqyly táýligine 1 369 jańa jaǵdaı tirkelip turǵanyn jetkizdi.
