Ótken táýlikte elde órtterde eki adam qaza tapty, taǵy bireýi jaraqattandy- QR TJM
ASTANA. 17 qazan. QazAqparat - Seısenbi kúni tústen keıin Almaty qalasynyń Bostandyq aýdanynda úsh qabatty úıge japsarlas salynǵan nysannyń 12 sharshy metr aýmaǵy órtendi, dep habarlady QR TJM-nen.
Órt 2,5 saǵattan keıin sóndirildi. Onymen kúreste QR TJM Almaty qalasy boıynsha TJD órt sóndirý qyzmetiniń 10 adamy men 2 tehnıkasy jumyldyryldy. Órt saldarynan jaraqat alǵan 28 jastaǵy er adam aýrýhanaǵa jetkizildi.
Budan basqa, Qaraǵandy oblysyna qarasty Ulytaý aýdanyndaǵy Sambet qystaǵynda keshe kúndiz qattalǵan shóp órtene bastady. Órtti tolyǵymen sóndirý 6,5 saǵattan keıin ǵana múmkin boldy. Onymen kúreske QR TJM Qaraǵandy oblystyq TJD órtke qarsy qyzmetiniń 5 adamy men 1 tehnıkasy, Amangeldi aýyldyq okrýginiń erikti órt sóndirýshiler jasaǵynyń 6 adamy men 2 tehnıkasy jumyldyryldy. Jalyn tili 1350 sharshy metrge tarady, 120 tonna shóp órtenip ketti. Qaza tapqandar men zardap shekkender joq.
Sondaı-aq keshe, Ońtústik Qazaqstan oblysy Arys aýdanynyń Josaly aýylynda jekemenshik turǵyn úıden órt shyqty. Tilsiz jaý jergilikti turǵyndardyń kúshimen sóndirildi. Órtke qarsy kúres qyzmeti shaqyrylǵan joq. Jalyn 12 sharshy metr aýmaqqa tarady. Oqıǵa ornynda 72 jastaǵy er adam men tulǵasy anyqtalmaǵan taǵy bir er adamnyń múrdeleri tabyldy.
