Ótken táýlikte el avtojoldarynda 5 adam mert bolyp, 14 adam zardap shekti
ASTANA. Jeltoqsannyń 31-i. QazAqparat - Ótken sársenbi, jeltoqsannyń 30-y kúni respýblıka joldarynda bolǵan jol-kólik oqıǵalarynda 5 adam qurban bolyp, taǵy 14 adam túrli dene jaraqattaryn aldy,
dep habarlady Tótenshe jaǵdaılar mınıstrliginen.
Máselen, Astana qalasyndaǵy Astrahan kúre jolynda «Aýdı» jáne «Mersedes» avtokólikteriniń soqtyǵysýy oryn alyp, onyń saldarynan birinshi kóliktiń 25 jastaǵy jolaýshysy oqıǵa ornynda kóz jumdy. 66 jastaǵy taǵy bir jolaýshysy aýrýhanaǵa jetkizildi.
Sondaı-aq Aqtóbe oblysy Samara-Shymkent avtojolynyń 631-shi shaqyrymynda «KamAZ» jáne«Mıtsýbısı» avtokólikteriniń qatysýymen bolǵan jol-kólik oqıǵasynda, jeńil kóliktiń júrgizýshisi men 4 jolaýshysy, onyń ishinde 2 jastaǵy jáne jańa týylǵan náreste aýrýhanaǵa jetkizildi.
Al Almaty oblysy Petropavl-Cherkaskoe avtojolynda «Opel» avtokóligin basqarǵan 32 jastaǵy júrgizýshi mashınanyń aýdarylýyna jol berip, onyń saldarynan júrgizýshiniń ózi men 38 jastaǵy jolaýshysy sol orynda mert boldy.
Atyraý qalasynyń Balyqshy-Shırın kósheleriniń qıylysynda «Opel» avtokóligi men «MMK» úlgisindegi traktordyń soqtyǵysýy boldy. Oqıǵa ornynda 19 jastaǵy jolaýshy qyz qaza tapty.
Bir adam qurban bolyp, taǵy 5 adam zardap shekken jol oqıǵasy Ońtústik Qazaqstan oblysy Almaty-Tashkent-Termez avtojolynyń 626-shy shaqyrymynda túńgi saǵat 01.45-te «Opel» jáne «Folksvagen» kólikteriniń qatysýymen boldy.
