Ótken táýlikte 6 adam sýǵa ketti - TJM
ASTANA. 4 shilde. QazAqparat - Ótken táýlikte respýblıka toǵandaryna 6 adam sýǵa batyp ketti, dep habarlaıdy Tótenshe jaǵdaılar mınıstrliginiń baspasóz qyzmetinen.
Atap aıtqanda, 3 shilde kúni Astanada belgisiz jaǵdaıda 37 jastaǵy er azamat sýǵa ketti. Onyń denesin sýdan jarty saǵattan keıin jergilikti turǵyndar alyp shyqty.
Keshe Almatyda «Delfın» demalys aýmaǵyndaǵy Bent kóline shomylyp júrgen jerinde 39 jastaǵy er azamat sýǵa ketken. Onyń denesi búgin tańerteń tabyldy.
Jambyl oblysynda da osyndaı oqıǵa oryn aldy - Oıtal aýylynyń irgesindegi toǵanǵa 32 jastaǵy er azamat batyp ketti. Onyń denesin sýdan qutqarýshylar búgin saǵat 5.32-de alyp shyqty.
Jeksenbi kúni Syrdarııada osyndaı oqıǵa oryn aldy - Qyzylorda oblysynyń Tóretam aýylynyń tusynda abaısyzda 51 jastaǵy azamat sýǵa batyp ketti. Onyń denesin sýdan bir saǵattan keıin jergilikti turǵyndar alyp shyqty. Oblystyń Kandoz eldi mekenindegi kanalǵa shomylyp júrgen jerinde 18 jastaǵy bozbala sýǵa ketti. Onyń denesi áli izdestirilýde.
Petropavlda Esilge shomylyp júrgen 22 jastaǵy jigit sýǵa batyp ketti. Onyń denesin jaǵaǵa 35 mınýttan keıin qutqarýshylar alyp shyqty.
