Ótken táýlik ishinde qar qursaýynan 203 adam qutqaryldy
ASTANA. QazAqparat - Keshe keshki saǵat 19.30-da «Sabyndy-Kendibıdaıyq» tas jolynyń 6 shaqyrymynda qar qursaýynda 6 jeńil avtokólik qalyp qoıǵan, olardyń ishinde barlyǵy 20 adam bolǵan. Qorǵaljyn aýdanynyń jáne QR TJM qyzmetkerleriniń kómegimen jolaýshylar aman-esen qardan tazartylǵan jolǵa shyǵarylyp, Sabyndy aýylyna deıin jetkizildi, dep habarlaıdy TJM baspasóz qyzmetinen.
Sondaı-aq sol kúni saǵat 20.50-de «Atbasar-Tımashevka» tas jolynyń 18 shaqyrymynda 9 jeńil jáne 2 júk kóligi (16 adam, onyń ishinde 5 bala) jolda qalyp qoıǵan. Oblystyń TJD órt sóndirý qyzmetiniń qyzmetkerlerinen 3 adam men 1 tehnıka jumyldyrylyp, kólikter qardan tazartylǵan jolǵa shyǵaryldy. Zardap shekkender joq.
Al 11 naýryz kúni saǵat 00.49-da «Atbasar-Shý» tas jolynyń 9 shaqyrymynda qar qursaýynda 1 avtokólik qalyp qoısa, saǵat 01.18-der shamasynda «Astana-Ereımentaý» tas jolynyń 31 shaqyrymynda ishinde 3 eresek adam jáne 5 bala bar 4 avtokólik qarǵa bógelip qalǵan. Oblystyń TJD órt sóndirý qyzmetiniń qyzmetkerlerimen jolda qalǵan barlyq jolaýshylarǵa kómek kórsetildi. Sondaı-aq «Ekaterınbýrg-Almaty» tas jolynyń 904 shaqyrymynda saǵat 02.45-te qar qursaýynda qalyp qoıǵan ishinde 3 adamy bolǵan 1 jeńil avtokólik qardan tazartylǵan jolǵa shyǵarylyp, Jaqsy aýylyna deıin jetkizilgen. Saǵat 03.30-da «Astana-Şýchınsk» tas jolynyń 190 shaqyrymynda Jańajol aýylyna 4 shaqyrym qalǵanda qar basqan jolda qalyp qoıǵan 1 jeńil kólik te oblystyń TJD órt sóndirý qyzmetiniń qyzmetkerleriniń kómegimen qar qursaýynan shyǵaryldy. Al elimizdiń ońtústik óńirindegi «Taldyqorǵan-Qapal» tas jolynyń 20 shaqyrymynda keshe saǵat 13.00-de 52 tehnıka, onyń ishinde 150 adam jolda qalyp qoıǵan. Almaty oblystyq TJD qyzmetkerleriniń kúshimen kólikter qar qursaýynan shyǵaryldy. Zardap shekkender joq. Ótken táýlik ishinde qar qursaýynan barlyǵy 203 adam (onyń ishinde 20 bala) men 76 tehnıka shyǵaryldy.
