Ótken saılaý Qazaqstannyń quqyqtyq jáne demokratııalyq memleket retinde damýda ekendigin kórsetti - Ǵanı Qasymov
ALMATY. 4 sáýir. QazAqparat /Erbol Azanbek/ - QR Prezıdentiniń kezekten tys saılaýynyń saılaýaldy kampanııasy jáne saılaý ádil ári demokratııalyq negizde ótti. Bul týraly búgin Almatyda jýrnalıstermen kezdesken prezıdenttikten úmitker bolǵan senator Ǵanı Qasymov aıtty.
Ol óz sózinde OSK-nyń aldyn-ala málimetteri boıynsha, óziniń 1,9 paıyz daýys jınaǵandyǵy Patrıottar partııasynyń 200 myń qoldaýshysy barlyǵyn kórsetkenin atap ótti. «Bul sandar QR Ádilet mınıstrliginde partııa múshesi retinde tirkelgen azamattardyń sanynan kóp. Bul aldaǵy parlamenttik saılaýǵa qatysýǵa óte qajetti negiz»,- dedi Ǵ.Qasymov.
Senator ótken saılaýdyń Qazaqstannyń quqyqtyq jáne demokratııalyq memleket retinde qurylý ústinde ekendigin taǵy bir dáleldegenin atap kórsetti. «Men óz basym qazaqstandyqtardyń ártúrli saıası partııalardy qoldap, sóz erkindigin, daýys erkindigin paıdalanǵandyǵyn kórdim. Saılaýaldy kampanııa barysynda ár úmitker óz baǵdarlamasyn tanystyryp, kez-kelgen jerde erkin pikir aıtyp, erkin sóıleýge múmkindik aldy. Maǵan bolmasa saılaýaldy shtabyma eshqandaı saıası qysym bolǵan joq. Barlyq úmitkerlerge BAQ-tar kedergisiz qoljetimdi boldy,- dedi Ǵ.Qasymov.
