Ótken eki aıda temirjol kólikteriniń astynda 11 adam mert boldy - «Lokomotıv» AQ
ASTANA. Naýryzdyń 10-y. QazAqparat - Temirjoldardaǵy tótenshe oqıǵalar tolastamaı tur. Ústimizdegi jylǵy eki aıdyń ishinde «Lokomotıv» AQ-nyń mashınısteri soqtyǵysýdy boldyrmas úshin 300 jaǵdaıda shuǵyl túrde toqtaýǵa májbúr bolǵan,
dep habarlaıdy QazAqparat kásiporynnyń baspasóz qyzmetine silteme jasap.
Júrgizilip jatqan aldyn alý jáne aqparattandyrý jumystaryna qaramastan, bolat joldardaǵy tótenshe oqıǵalardyń statıstıkasy joǵarylaý úrdisin saqtap keledi. Ústimizdegi jylǵy eki aıdyń ózinde «Lokomotıv» AQ-nyń mashınısteri soqtyǵysýdy boldyrmas úshin 300 jaǵdaıda shuǵyl túrde toqtaýǵa májbúr bolǵan. Onyń 31-inde soqtyǵysýdyń aldyn alý múmkin bolmady. Jazataıym oqıǵalardyń 15-i - adamdardyń, 4-ýi - janýarlardyń qatysýymen oryn aldy. 11 adam oqıǵa ornynda jan tásil etse, 4 adam túrli dárejedegi jaraqattarmen arýhanaǵa jetkizildi.
Oqys oqıǵalardyń oryn alýyna jasalǵan taldaý nátıjeleri, adamdardyń asa qaýipti aýmaq bolyp tabylatyn - temirjoldarda qarapaıym qaýipsizdik erejelerin saqtamaýynan bolatynyn kórsetip otyr.
«Lokomotıv» AQ-nyń qozǵalys qaýipsizdigi boıynsha bólim bastyǵy Sergeı Chernaıdyń atap kórsetýinshe, jyl basynan beri temirjol ótkelderinde 12 jol-kólik oqıǵasy tirkeldi. Bul kórsetkish 2009 jylǵy statıstıkadan eki esege kóp. Soqtyǵysý saldarynan 4 adam qaza tapty.
Bolat joldarda bolatyn barlyq jol-kólik oqıǵalarynyń basty sebebi - avtokólik ıeleriniń jol-kólik erejelerin óreskel buzýynda. Olardyń basym deni qozǵalysqa tyıym salǵan baǵdarshamdy elemeı jáne jabylǵan ne bolmasa jabylýǵa ázirlik ústindegi shlagbaýmǵa qaramastan temirjoldardy kesip ótý kezinde oryn alǵan.
