Ótken demalysta 22 kólik qar qursaýynan shyǵarylyp, 62 adam qutqaryldy - SQO
PETROPAVL. QazAqparat – Soltústik Qazaqstan oblysynda ótken demalys kúnderi qatty boran men kóktaıǵaqtyń saldarynan patrýldi polıtseıler men qutqarýshylar damyl kóredi, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, aýa raıynyń qolaısyzdyǵyna baılanysty demalys kúnderi respýblıkalyq mańyzy bar 5 baǵyt boıynsha jáne barlyq oblystyq mańyzdaǵy avtojoldar jabyldy.
Daýyldy eskertý jóninde sms-habarlama jiberilip, áleýmettik jelilerde jarııalanǵan.
Alaıda, soǵan qaramastan osy kúnderi patrýl polıtseıleri men qutqarýshylar 22 kólikti qar qursaýynan shyǵaryp aldy.
«Mamlıýtka - Qostanaı» baǵytynda kezekshilikte júrgen tártip saqshylary jol jıegine túsip ketken «Lada Kalina» jáne «VAZ 2110» avtokólikterin kóredi.
Qatty jel men kóktaıǵaqtan júrgizýshiler rólge ıe bola almaı qalyp, joldan shyǵyp ketipti.
Júrgizýshilerdiń de, jolaýshylardyń da din aman ekenin kórgen patrýl polıtseıleri «Qazavtodor» JShS-ne habarlasyp, olar aýyr júk kóligin kómekke jiberdi.
Eki mashına da jolǵa shyǵyp, saparyn jalǵastyrdy.
«Joldar jabylyp, kóliktiń júrýine shekteý qoıylǵanymen jolǵa shyqqandar boldy. TJD mamandarymen birge 22 kólikti jáne 62 adamdy qutqardyq. Keptelister bolmaýy úshin 50-60 tehnıkadan quralǵan avtokolonnalardy jasaqtap, olar patrýldi ekıpajdardyń sońynan ilesip júrip otyrdy. Qazir kúndelikti 15 ekıpaj oblys joldarynda jumys isteıdi. SQO-nyń aýa raıy qubylmaly, sol sebepti jolǵa shyqpas buryn sınoptıkterdiń boljamyna qulaq túrýge keńes beremiz. Sondaı-aq alys jolǵa shyqpas buryn tehnıkanyń jaǵdaıyn tekserip alǵan jón», - deıdi SQO PD patrýldi polıtsııa batalonynyń komandıri Erlan Mádıev.
