Ótken demalys kúnderi kólikti mas kúıinde basqarǵan 35 júrgizýshi ustaldy - Astana qalasynyń Jol polıtsııasy
ASTANA. Tamyzdyń 3-i. QazAqparat - Ótken demalys kúnderi, shildeniń 31-i men tamyzdyń 1-i aralyǵynda Astana qalasynda kólikti mas kúıinde basqarǵan 35 júrgizýshi ustaldy,
dep habarlaıdy QazAqparat Astana qalalyq Jol polıtsııasy basqarmasynyń baspasóz qyzmetine silteme jasap.
«Ótken demalys kúnderinde elordada 35 júrgizýshi ishimdik iship kólikti basqarǵany úshin ustaldy. Jyldamdyqty shamadan tys asyrǵan 145 júrgizýshige ákimshilik hattamalar toltyryldy. Al 42 júrgizýshige tehnıkalyq jaǵdaıy saı emes kólikti basqarǵany úshin, 29 júrgizýshige rólde otyryp uıaly telefonmen sóıleskeni úshin aıyppul salyndy», delingen baspasóz habarlamasynda.
Sonymen qatar atalǵan kúnderi qarsy bettegi jol bóligine shyqqan 18 júrgizýshige, kólik júrgizýge qajetti qujattarynsyz kólik basqarǵan 11 adamǵa ákimshilik hattamalar toltyrylǵan. 31 kólik aıyp turaǵyna qoıyldy.
Jalpy, ótken aptada Astanada 10 jol-kólik oqıǵasy tirkelip, onda 10 adam túrli jaraqattar aldy.
