Ótken bir jylda ádiletti, teńgerimdi, demokratııalyq saıası júıeniń negizi qalandy - Máýlen Áshimbaev
Senat tóraǵasy Máýlen Áshimbaev Qasym-Jomart Toqaevtyń elimizdiń prezıdenti qyzmetine resmı kiriskenine týra bir jyl tolýyna oraı áleýmettik jelide pikir bildirdi, dep habarlaıdy Kazinform.
«Búgin Qasym-Jomart Kemeluly Toqaevtyń 2022 jylǵy jalpyulttyq saılaýda jeńiske jetip, el prezıdenti qyzmetine resmı kiriskenine týra bir jyl tolyp otyr. Atalǵan saılaýda Qazaqstan halqynyń basym kópshiligi Memleket basshysy usynǵan reformalar baǵdarlamasyn jáne Ádiletti Qazaqstan qurý baǵdaryn qoldap, daýys bergen edi. Osy ýaqyt ishinde elimizdiń qoǵamdyq-saıası ómirine jáne ekonomıkasyna áser etken aıtarlyqtaı ózgerister boldy. Bıliktiń barlyq tarmaqtary qaıta jańǵyrtyldy. Saıası júıeni demokratııalandyrý jolynda mańyzdy qadamdar jasaldy. Tejemelik pen tepe-teńdik júıesi kúsheıe tústi. Óńirlerdiń derbestigi de nyǵaıyp keledi. Ákimshilik reforma iske asyryla bastady», — deıdi Senat spıkeri.
Onyń aıtýynsha, osy bir jylda saılaý júıesi jańartylyp, sonyń negizinde Májilis jáne barlyq deńgeıdegi máslıhattar saılaýy ótti.
Aýdandar men aýyl ákimderiniń saılaýy da jańa talaptarǵa sáıkes ótkizilip jatqany belgili.
Jalpy aıtqanda, ótken bir jyldyń ishinde elimizde ádiletti, teńgerimdi jáne demokratııalyq saıası júıeniń negizi qalandy.
Halyqtyń ál-aýqatyn jaqsartý jáne ómir súrý sapasyn arttyrý baǵytynda da aýqymdy jumys atqaryldy.
«Áleýmettik saıasattyń tıimdiligin arttyrý úshin arnaıy Áleýmettik kodeks qabyldandy. „Jaıly mektep“, „Aýylda densaýlyq saqtaýdy jańǵyrtý“, „Aýyl amanaty“ sııaqty ulttyq jobalar júıeli túrde júzege asyrylyp keledi. Kelesi jyldan bastap „Ulttyq qor — balalarǵa“ prezıdenttik baǵdarlamasy aıasynda tólemder tólene bastaıdy. Qazirdiń ózinde ádiletti ekonomıkalyq júıe qurý baǵytyndaǵy jumystardyń naqty nátıjelerin kórip otyrmyz. Monopolııamen jáne sybaılas jemqorlyqpen qatań kúres qarqyndy júrgizilip jatyr. Jalpy somasy 1 trln teńge bolatyn zańsyz ıemdenilgen aktıvter jáne shamamen 8 mln gektar paıdalanylmaı jatqan jer memleketke qaıtaryldy. Shaǵyn jáne orta bıznesti qoldaýǵa arnalǵan júıeli sharalar qolǵa alyndy. El ekonomıkasyna sheteldik ınvestıtsııalardyń salynýy da belsendi jalǵasyp keledi. Syrtqy saýdanyń ósý qarqyny kóńil qýantady. Osyndaı sharalardyń arqasynda 2023 jyldyń qorytyndysy boıynsha el ekonomıkasynyń ósýi 5 paıyz kóleminde bolady dep boljanyp otyr. Mundaı nátıjeler Prezıdentimizdiń bastamasymen iske asyrylyp jatqan reformalardyń tıimdiligin aıqyn kórsetedi», — deıdi Máýlen Áshimbaev.
Ol bir jylda kóp jumys istelgenin atap ótti. Degenmen alda áli talaı aýqymdy mindetter tur.
Memleket basshysy 2029 jylǵa qaraı eldiń jalpy ishki ónimin 2 esege ulǵaıtýdy, ıaǵnı 450 mlrd dollarǵa jetkizýdi mindet etip belgilep berdi.
Sondaı-aq ekonomıkany ártaraptandyrý, óńdeý ónerkásibin damytý, aýyl sharýashylyǵynyń ónimdiligi men tıimdiligin arttyrý, elimizdiń barlyq óńirinde ınfraqurylymdy jańǵyrtý jáne qazaqstandyqtardyń ál-aýqatyn odan ári jaqsartý sııaqty strategııalyq mejeler bar.
«Osyndaı maqsat-mindetterdi nátıjeli iske asyrý úshin qazaqstandyqtardyń aldaǵy ýaqytta da Prezıdentimiz Qasym-Jomart Kemeluly Toqaevtyń saıasatyn qoldap, Memleket basshysynyń tóńireginde toptasýy asa mańyzdy. „Birligi bekem el bıikti baǵyndyrady“ deıdi. Shyn máninde, biz ádiletti, jańarǵan, ınklıýzıvti jáne demokratııalyq Qazaqstan qurý jolynda judyryqtaı jumyla bilsek, kózdegen maqsattarymyzǵa qol jetkizemiz», — dep túıindedi sózin Senat tóraǵasy.