Ótken bir jyl ishinde ishki ister organdary 2 mln.-nan astam ótinishterdi qarady - ІІM
ASTANA. QazAqparat - Ótken bir jyl ishinde ishki ister organdary 2 mln.-nan astam ótinishterdi qarady. Búgin Zańdylyqty qamtamasyz etý, quqyqtyq tártip jáne qylmyspen kúres jónindegi Úılestirý keńesiniń kezekti otyrysynda Іshki ister mınıstri Qalmuhanbet Qasymov osylaı málim etti.
«Bul kórsetkish aldyńǵy 2012 jylǵa qaraǵanda 12 paıyzǵa artyq. Sonymen birge, azamattar aryzdarynyń qaralý merzimi de qysqara tústi. Máselen, aryzdardyń 94 paıyzy 3 kúndik merzim ishinde qaralady. Osynyń ózi halyqtyń polıtsııaǵa degen seniminiń ósip kele jatqanynyń belgisi», - deıdi mınıstr Qasymov.
Onyń sózine qaraǵanda, byltyrǵy jyly ishki ister organdarymen 348 myń qylmystyq is qozǵaldy. 246 myń ákimshilik quqyq buzýshylyq isi tergelgen. «Bunymen qosa, ótinishterdi tirkeý men olardy qaraý azamattar úshin ashyq bola tústi. Jalpy, ótken jyly krımınogendik ahýaldyń ózgerýi baıqalmaǵan», - dedi mınıstr Q. Qasymov.
Onyń aıtýynsha, asa aýyr qylmystar sany on bes paıyzǵa azaıǵan. Sonymen qatar, byltyrǵy jyly kisi óltirý qylmysy 12 paıyzǵa qysqarsa, tonaý 7 paıyzǵa kemidi, al qaraqshylyq qylmysy 18 paıyzǵa azaıǵan. Kámeletke tolmaǵandar arasyndaǵy qylmys 8 paıyzǵa, qarý qoldana otyryp jasalǵan qylmystar 11 paıyzǵa tómendedi.
