Ótken aıda jeke tulǵalarǵa berilgen kredıt kólemi 10 trln teńgeden asqan
NUR-SULTAN. QazAqparat – QR Ulttyq banki kredıt naryǵynyń jeltoqsan aıyndaǵay jaǵdaıyna sholý jasady, dep habarlaıdy QazAqparat tilshisi.
Ulttyq banktiń resmı saıtyndaǵy málimet boıynsha, 2021 jyldyń sońǵy aıynda bankterdiń ekonomıkany kredıtteý kólemi 3,7% ulǵaıyp, 18 trln 497,7 mlrd teńge bolǵan (jyldyq mánde ósim – 26,5%). Zańdy tulǵalarǵa berilgen kredıt kólemi bir aıda 7 trln 758,8 mlrd teńgege deıin nemese 3,5%, al jeke tulǵalarǵa berilgen nesıe kólemi 10 trln 738,8 mlrd teńgege deıin nemese 3,8% artqan.
«Ulttyq valıýtadaǵy kredıtter kólemi bir aıda 16 trln 588,2 mlrd teńgege deıin nemese 3,8% ulǵaıdy. Onyń ishinde zańdy tulǵalardiki 3,8%, jeke tulǵalardiki 3,9% ósti. Shetel valıýtasyndaǵy kredıtter kólemi 1 trln 909,5 mlrd teńgege deıin nemese 2,6% ulǵaıdy. Onyń ishinde zańdy tulǵalardiki 2,6% ósse, jeke tulǵalardiki 0,9% tómendedi. Jeltoqsannyń sońynda teńgemen berilgen kredıtterdiń úles salmaǵy 89,7% (2020 jylǵy jeltoqsanda – 87,0%) boldy», - dep jazylǵan resmı málimette.
Ulttyq bank saıtynyń jazýynsha, uzaq merzimdi kredıtter kólemi bir aıda 16 trln 30,5 mlrd teńgege deıin nemese 3,9%, qysqa merzimdi kredıtter kólemi – 2 trln 467,2 mlrd teńgege deıin nemese 2,7% ulǵaıǵan.
Onyń ishinde shaǵyn kásipkerlik sýbektilerine jeltoqsan aıynda 3 trln 772,2 mlrd teńge kredıt (jalpy korporatıvtik sektor kredıtterdiń 48,6%-y) berilgen.
Al banktik emes zańdy tulǵalarǵa ulttyq valıýtamen berilgen kredıtterdiń ortasha syıaqy mólsherlemesi 12,2% (2020 jylǵy jeltoqsanda – 11,4%), jeke tulǵalarǵa – 17,5% bolǵan (14,9%).
