Ótken aıda «Tutynýshylardyń seziný ındeksi» 3 paıyzdyq tarmaqqa ósti - Statıstıka agenttigi
ASTANA. Maýsymnyń 12-si. QazAqparat /Qanat Mámetqazyuly/ - 2010 jyldyń mamyr aıynda «Tutynýshylardyń seziný ındeksi» ótken aımen salystyrǵanda 3 paıyzdyq tarmaqqa ósip, +15 paıyzdy qurady. 2010 jylǵy mamyrda respondentterdiń 28 paıyzy sońǵy 12 aı ishinde elimizdegi ekonomıkalyq jaǵdaıdyń jaqsarǵanyn atap ótti. Sonymen bir mezgilde, respondentterdiń 15 paıyzy jaǵdaıdyń nasharlaǵanyn habarlady.
Statıstıka agenttiginiń málimetterine qaraǵanda, esepti kezeńde «Ekonomıkalyq ahýal ındeksi» 3 paıyzdyq tarmaqqa ósip, +18 paıyzdy qurady. Respondentterdiń 30 paıyzy aldaǵy 12 aıda eldegi jalpy ekonomıkalyq jaǵdaıdyń odan ári jaqsaratynyn kútedi, al 12 paıyzy jaǵdaıdyń nasharlaýy múmkin dep esepteıdi.
«Satyp alý tileginiń ındeksi» ótken aımen salystyrǵanda 2 paıyzdyq tarmaqqa ósti (+12 paıyz). Sonymen birge, saýalnamaǵa qatysqandardyń 30 paıyzy 2010 jylǵy mamyrda jeke úı sharýashylyǵyndaǵy qarjy jaǵdaıynyń jaqsarǵanyn jáne tıisinshe, ótken aımen salystyrǵanda uzaq paıdalanatyn taýarlarǵa suranystyń óskeni týraly habarlady. Sonymen birge, respondentterdiń 17 paıyzy óz úı sharýashylyǵyndaǵy qarjy-ekonomıkalyq jaǵdaıdyń nasharlaǵanyn atap ótti.
Budan bólek, saýalnamaǵa qatysýshylardyń 6 paıyzynyń pikiri boıynsha elimizdegi jumyssyzdyq deńgeıine qatysty ahýal aldymyzdaǵy 12 aıdyń ishinde jaqsarady delinse, suralǵandardyń 3 paıyzy oǵan qarama-qarsy pikirdi ustanady. Aldymyzdaǵy 12 aıdyń ishinde úı sharýashylyǵyndaǵy aqshalaı qorlanym somasynyń ósý múmkindigin suralǵan tutynýshylardyń 15 paıyzy atap ótse, al 17 paıyzy onyń kemıtinin aıtqan.
