Ótken aıda respýblıkada ınflıatsııa deńgeıi 0,4 paıyz kóleminde boldy
ASTANA. Qarashanyń 2-si. QazAqparat - 2009 jylǵy qazanda Qazaqstan Respýblıkasyndaǵy ınflıatsııa 0,4 paıyzdy qurady,
dep habarlaıdy QazAqparat QR Statıstıka agenttigine silteme jasap.
Agenttiktiń taratqan málimetteri boıynsha, ótken aıda respýblıkada aqyly qyzmetterge baǵa - 0,9 paıyzǵa, azyq-túlik emes taýarlarǵa - 0,4 paıyzǵa ósti. Baǵa ındeksi azyq-túlik taýarlaryna 100 paıyzdy qurady.
Sondaı-aq, qatty otyn - 1,7, medıtsınalyq dári-dármekter - 0,8, kıim, aıaq kıim jáne ydys - 0,6, kitaptar men gazetter - 0,4 paıyzǵa qymbattady. Baǵanyń ósýi sonymen qatar, benzınge - 0,7 jáne dızel otynyna - 0,3 paıyzǵa tirkeldi. Al qurylys materıaldary, kerisinshe, 1,5 paıyzǵa arzandady.
Bilim berý, densaýlyq saqtaý qyzmetteri - 0,9, meıramhanalar men qonaq úılerdiń qyzmetteri - 0,7, mádenıet jáne jeke qyzmetter - 0,5 paıyzǵa joǵarylady, al jolaýshylardy tasymaldaý qyzmetteri - 0,8 paıyzǵa tómendedi.
Sonymen qatar, turǵyn úı-kommýnaldyq qyzmetter salasynda tarıftiń ósýi kárizge - 3,1 paıyzǵa, ortalyqtan jylytýǵa - 3, sýyq sýǵa - 2,3, ystyq sýǵa - 1,7 jáne elektr energııasyna - 0,3 paıyzǵa baıqaldy.
