Ótken aıda ónerkásip ónimderin óndirýshi kásiporyndardyń baǵasy 1 paıyzǵa tómendedi
ASTANA. Qarashanyń 4-i. QazAqparat /Qanat Mámetqazyuly/ -2009 jyldyń qazan aıyndaǵy jaǵdaı boıynsha elimizdegi ónerkásip ónimderin óndirýshi kásiporyndardyń baǵasy bir paıyzǵa tómendedi.
Bul týraly QazAqparat QR Statıstıka agenttiginiń baspasóz qyzmetine silteme jasap habarlaıdy.
Atap aıtqanda, aǵymdaǵy jyldyń qazan aıynda ótken aımen salystyrǵanda baǵa ken óndirý ónerkásibinde 2,4 paıyzǵa tómendegen. Al, kerisinshe baǵa óńdeý ónerkásibinde - 0,9 paıyzǵa, elektr energııasyn, gaz ben sý óndirý jáne bólýde - 0,5 paıyzǵa joǵarylaǵan. Sonymen qatar, qazan aıynda munaıǵa baǵanyń - 3,4 paıyzǵa, gaz kondensatyna - 1,9 paıyzǵa, óńdelmegen alıýmınııge - 0,3 paıyzǵa tómendeýi baıqalǵan. Al suıytylǵan propan jáne býtanǵa qatysty baǵa - 7,3 paıyzǵa, metal kenderine - 6,8 paıyzǵa, ferroqorytpalarǵa - 1,7 paıyzǵa joǵarylaýy tirkeldi.
Budan basqa, azyq-túlik ónimderinen bıdaı uny 4,6 paıyzǵa, jarmalar - 1,3 paıyzǵa, ósimdik maıy men makaron ónimderi - 0,7 paıyzǵa arzandady. Al, kúrish baǵasy - 7,9 paıyz, qant - 3,9 paıyz, balyq - 3,6 paıyz, spırt - 3,2 paıyz, kondıter ónimderi - 1,9 paıyz qymbattaǵan.
