Ótken aıda ónerkásip ónimderin óndirýshi kásiporyndardyń baǵasy 1,4 paıyzǵa joǵarylaǵan
ASTANA. Naýryzdyń 1-i. QazAqparat /Qanat Mámetqazyuly/ - Ótken aqpan aıynda elimizdegi ónerkásip óndirýshi kásiporyndardyń baǵasy 1,4 paıyzǵa joǵarylady.
Bul týraly QazAqparat QR Statıstıka agenttiginiń baspasóz qyzmetine silteme jasap habarlaıdy.
Statıstıka agenttiginiń málimetterine qaraǵanda, aǵymdaǵy jyldyń aqpanynda qańtar aıymen salystyrǵanda baǵa ken óndirý ónerkásibinde 1,3 paıyzǵa, óńdeý ónerkásibinde - 1 paıyzǵa, elektr energııasyn, gaz ben sý óndirý jáne bólýde - 3,5 paıyzǵa joǵarylaǵan.
Bunymen qosa, ótken aıda baǵanyń tabıǵı gazǵa 7 paıyz, elektr energııasyna - 5,1 paıyz, metall kenderine - 4,8 paıyz, gaz kondensatyna - 3 paıyz, dızel otynyna - 2,9 paıyz, jylý energııasyna - 0,7 paıyzǵa artqany tirkelgen. Sonymen bir mezgilde, baǵanyń benzınge - 1,7 paıyzǵa, kómirge - 0,1 paıyzǵa tómendeýi baıqalǵan.
Budan bólek aı ishinde mystyń baǵasy - 5,1 paıyzǵa, óńdelmegen alıýmınıı 4,3 paıyzǵa, myrysh 3,5 paıyzǵa, qorǵasyn 3,3 paıyzǵa, ferroqorytpalar 1,5 paıyzǵa, qara metaldar ılegi 0,4 paıyzǵa joǵarylaǵan.
Sondaı-aq, shaı - 1,3 paıyz, ósimdik maıy - 0,9 paıyz, sút ónimderi - 0,6 paıyzǵa qymbattasa, qus eti - 2,8 paıyzǵa, bıdaı uny - 2,3 paıyzǵa, balyq - 2,1 paıyzǵa, jarmalar - 0,5 paıyzǵa arzandaǵan.
