Ótken aıda elimizdegi jumyssyzdyq deńgeıi 5 paıyzdy qurady
ASTANA. QazAqparat - 2014 jylǵy jeltoqsanda elimizdegi jumyssyzdar sany baǵalaý boıynsha 458,8 myń adamdy qurady, jumyssyzdyq deńgeıi 5,0 paıyz deńgeıinde bolyp otyr. Bul týraly QR Ulttyq ekonomıka mınıstrligi Statıstıka komıtetiniń baspasóz qyzmetinen habarlandy.
Komıtet usynǵan málimetterge qaraǵanda, respýblıka ekonomıkasynda 2014 jylǵy jeltoqsanda 8,7 mln. adam jumyspen qamtylǵan. Ótken jylǵy sáıkes kezeńge qaraǵanda olardyń sany 75,3 myń adamǵa nemese 0,9 paıyzǵa kóbeıip otyr.
Sonymen qatar, jaldamaly qyzmetkerlerdiń sany atalǵan kezeńde 6,1 mln. adamdy (jumyspen qamtylǵandardyń jalpy sanynan 70,6 paıyzy) qurady. 2014 jylǵy IV toqsannyń aldyn ala derekteri boıynsha óz betinshe jumyspen qamtylǵandardyń jalpy sanynan jumyspen nátıjeli qamtylǵandar úlesi 71,7 paıyzdy, jumyspen nátıjesiz qamtylǵandar - 28,3 paıyzdy qurady.
«Jumyspen qamtý organdarynda 2014 jylǵy jeltoqsan aıynyń sońyna 33,4 myń adam («Jumyspen qamtý 2020 jol kartasy» baǵdarlamasyna qatysatyndar quramyna engizilgen tulǵalardyń esebinsiz) resmı tirkelgen. Tirkelgen jumyssyzdar úlesi ekonomıkalyq turǵydan belsendi halyqtyń 0,4 paıyzyn qurady, ótken 2013 jylǵy jeltoqsanda bul kórsetkish 0,3 paıyz bolatyn», - delingen baspasóz baıanynda.
