Ótken aıda elimizdegi jumyssyzdyq deńgeıi 5,1 paıyzdy qurady
QR Statıstıka agenttiginiń habarlaýynsha, respýblıka ekonomıkasynda 2014 jylǵy shildede 8,7 mln. adam jumyspen qamtyldy. Bul ótken jylǵy sáıkes kezeńge qaraǵanda jumyspen qamtylǵandar sany 87,0 myń adamǵa nemese 1,0 paıyzǵa kóbeıdi. Al jaldamaly qyzmetkerlerdiń sany atalǵan kezeńde 6,1 mln. adamdy (jumyspen qamtylǵandardyń jalpy sanynan 69,8%) quraǵan. Sonymen qatar, 2014 jylǵy II toqsan boıynsha óz betinshe jumyspen qamtylǵandardyń jalpy sanynan jumyspen nátıjeli qamtylǵandar úlesi 70,0 paıyzdy, jumyspen nátıjesiz qamtylǵandar - 30,0 paıyzdy quraǵan.
«Qazaqstan Respýblıkasy Eńbek jáne halyqty áleýmettik qorǵaý mınıstrliginiń jumyspen qamtý organdarynda 2014 jylǵy shilde aıynyń sońyna 59,2 myń adam («Jumyspen qamtý - 2020 jol kartasy» baǵdarlamasyna qatysatyndar quramyna engizilgen tulǵalardyń esebinsiz) resmı tirkelgen. Tirkelgen jumyssyzdar úlesi ekonomıkalyq turǵydan belsendi halyqtyń 0,6 paıyzyn qurap otyr, bul kórsetkish ótken 2013 jylǵy shildemen birdeı bolyp tabylady», - delingen baspasóz baıanynda.