Ótken aıda elde ne arzandap, ne qymbattady

ASTANA. KAZINFORM — 2025 jylǵy qarashadaǵy aılyq ınflıatsııa deńgeıi 0,8% boldy. Bul týraly Ulttyq statıstıka bıýrosy habarlady. 

— Azyq-túlik taýarlarynyń ishinde qyryqqabat 2,5%, sábiz — 2%, qyzylsha — 1,4%, qant — 1,3%, apelsın — 1%, kúrish — 0,5% arzandady. Baǵanyń ósýi kelesi taýarlarda baıqaldy: tátti burysh — 5,2%, tústi qyryqqabat — 5,1%, lımon, shokolad — árqaısysy 1,9%-dan, makaron ónimderi — 0,4%.

Azyq-túlikke jatpaıtyn taýarlar arasynda bıylǵy qarasha aıynda qýat únemdeıtin shamnyń baǵasy 1,7%, elimizde qurastyrylǵan jańa avtokólikter — 1,2%, qazan — 0,8% tómendedi. Smartfondar 5,4%, kir jýǵysh mashınalar — 2,5%, tósek oryn jınaqtary — 0,5% qymbattady.

Turǵyn úı-kommýnaldyq qyzmetter salasynda sýyq sý tarıfi 7,1%, sý burý — 6,2%, ortalyqtan jylytý — 4,9%, elektr energııasy — 2,7% tómendedi. Shet tilderin oqytý kýrstary 2,6%, ashanadaǵy túski as — 1,6%, dárigerge alǵashqy qaralý — 0,7% qymbattaǵan, — delingen habarlamada

Jyldyq mánde ınflıatsııa 2025 jylǵy qarashada 12,4% boldy.

— Azyq-túlik taýarlary boıynsha qyzanaq jyldyq mánde 8,1%, kúrish — 6,9%, tátti burysh — 1,2% arzandaǵan. Kerisinshe jumyrtqa 3,9%, sarymsaq — 3% qymbattaǵan.

Azyq-túlikke jatpaıtyn taýarlardyń ishinde kir keptirgish 27,6%, muzdatqysh 14,6%, útikteý taqtasy 12% arzandady. Ydys jýýǵa arnalǵan quraldar baǵasynyń deńgeıi 7,7%, qabyrǵa kafeli 6,2%, elektrosamokat 3,6% ósken.

2024 jyldyń qarasha aıymen salystyrǵanda qoqys shyǵarý qyzmetteriniń baǵasy 8,5%, fotosýretterdi basyp shyǵarý qyzmetiniń baǵasy 7,5%, týrıstterdi medıtsınalyq saqtandyrý 4,4% ósken, — delingen Ulttyq statıstıka habarlamasynda.

Inflıatsııa deńgeıin sıpattaıtyn tutyný baǵalary ındeksiniń kórsetkishi aı saıyn esepteledi. Baqylaýlar qyzmetter men taýarlardyń tarıfteri men baǵalary — barlyǵy 508 pozıtsııa boıynsha júrgiziledi.

2025 jylǵy qańtardan bastap tutyný baǵalarynyń ındeksin eseptegende azyq–túlik taýarlarynyń úlesi — 40,0%, azyq-túlik emes taýarlar — 30,3%, aqyly qyzmetter 29,7% boldy.