Ótken aptanyń ishinde elde 19 adam sýǵa ketti
NUR-SULTAN. QazAqparat – 2019 jyldyń 5-11 tamyz aralyǵynda, eldiń sý aıdyndarynda 19 adam kóz jumdy. Onyń beseýi – bala, dep habarlaıdy QazAqparat QR ІІM Tótenshe jaǵdaılar komıtetiniń baspasóz qyzmetine silteme jasap.
14 adamnyń, sonyń ishinde 4 balanyń, ólimine shomylý kezinde shamasyna qaramaý sebep boldy. Eki bala qaraýsyz qalyp, sýǵa batyp ketken. Bir adam sý aıdynyn júzip ótpek bolyp kóz jumsa, taǵy ekeýi balyq aýlaý kezinde qaýipsizdik erejelerin saqtamaýdan qaza tapty.
12 tamyzdaǵy jaǵdaıǵa sáıkes, shomylý maýsymy bastalǵaly beri eldiń sý aıdandarynda 249 adam batyp ketken (2018 jyly – 238 adam), onyń 84-i – balalar (2018 jyly – 68 bala).
Adamdardyń kóz jumýyna shomylý kezinde shamasyna qaramaý (201 adam, 58-i - bala), balalardyń úlkenderdiń qaraýynsyz qalýy (24 bala sýǵa qulap, kóz jumǵan) sebep boldy, 22 adam mas kúıinde shomylyp qaza tapsa, 2 bala júze almaǵandyqtan batyp ketken.
Shomylý maýsymy bastalǵaly beri adamdardyń sýǵa batyp ketý derekteri eń kóp tirkelgen aımaqtarǵa Almaty, Túrkistan, Shyǵys Qazaqstan, Pavlodar jáne Aqmola oblystary jatady.
