Ótken aptadaǵy el sportynda erekshe oqıǵalar
NUR-SULTAN. QazAqparat – El sportynda ótip bara jatqan aptada jaǵymdy jańalyqtar az bolǵan joq. Qazaqstandyq sportshylar birqatar saıystarda aldyńǵy lekten kórindi. Endigi birinde esemiz ketken tusymyz da az emes. Ádette, jyldyń kúz mezgili san alýan saıystarǵa toly kezeń esebinde erekshelenedi. Alda úkili úmitti sańlaqtarymyzdy kóptegen jarystar kútip tur. QazAqparat tilshisi sportta ótip bara jatqan aptadaǵy bolǵan oqıǵalardy oı eleginen ótkizip kórgen edi.
Kýbokty qaı komanda alady?
Fýtboldan Qazaqstan kýbogynyń jartylaı fınalyna joldama alǵan komandalar anyqtaldy.
Elordada «Astana» Túrkistan oblysynyń «Maqtaaralyn» 1:0 esebimen jeńdi. Al «Taraz» ben «Shahter» negizgi jáne qosymsha kezeńde 1:1 esebimen teń túsip, penaltıde tarazdyq klýb múlt ketken joq.
Taǵy bir kezdesýde almatylyq «Qaırat» óz alańynda «Aqjaıyqqa» 1:2 esebimen jol berdi. Qyzylordada jergilikti «Qaısar» Shymkenttiń «Ordabasy» klýbymen negizgi jáne qosymsha kezeńinde 1:1 esebi teń túsip, penaltıde shymkenttik klýbtyń joly boldy
Endi 19 qazanda jartylaı fınalda «Astana» men «Ordabasy», «Aqjaıyq» pen «Taraz» kezdesedi.
Qazaqstan kýbogy 1992 jyldan beri turaqty túrde ótkizilip keledi. Búginge deıin atalǵan kýbokty «Qaırat» 10 márte tóbesine kóterdi.
«Saryarqa» - úshinshi márte jeńimpaz
Qaraǵandylyq «Saryarqa» shaıbaly hokkeıden Qazaqstan kýbogynyń bıylǵy ıegeri atandy. Atalǵan klýb fınalda Kókshetaýdyń «Arlanyn» 3:0 esebimen tize búktirdi. Nátıjesinde qatarynan úshinshi márte kýbokqa qol jetkizdi.
Bıylǵy 10 qyrkúıekte shaıbaly hokkeıden Qazaqstan birinshiligi bastalady. Onda barlyǵy 12 komanda baq synaıdy dep kútilýde. Birinshilik barysynda «Aqtóbe», «Almaty», «Arlan», «Beıbarys», «Gornıak», «Ertis», «Kulager», «Nomad», «Saryarqa», «Snejnye Barsy» jáne «Torpedo» saıysqa túsedi.
Sondaı-aq, elordalyq «Barys» Qurlyqtyq hokkeı lıgasyndaǵy alǵashqy oıynyn ótkizdi.
Bul joly syrt aıdynda Belarýstiń «Dınamo» (Mınsk) komandasymen sheberlik baıqasty. Kezdesýdi belarýstik komanda belsendi bastady. Nátıjesinde olardyń qatarynan Dmıtrıı Sokolov 8, Nık Merklı 21-mınýtta mergendigimen kózge tústi.
Ekinshi kezeńniń 36-mınýtynda «Barys» hokkeıshisi Anton Sagadeev esep aıyrmasyn qysqartty. Ol 41-mınýtta tarazy basyn teńestirdi. Kezdesýdiń 46-mınýtynda qazaqstandyq Ádil Beketaev elordalyq klýbty alǵa shyǵardy. Al 58-mınýtta «Dınamo» hokkeıshisi Brendon Kozýn kózdegen nysanadan múlt ketken joq.
Osylaısha eki komanda negizgi kezeńde 3:3 esebine qanaǵat bildirip, oıyn overtaımǵa ulasty. Overtmaıda da jeńimpaz anyqtalǵan joq. Býllıtte «Dınamonyń» joly boldy.
Jánibek Álimhanulynyń qarsylasy kim?
WBO nusqasy boıynsha orta salmaqtaǵy álem chempıony qazaqstandyq Jánibek Álimhanuly (12-0, 8 KO) Búkilálemdik boks uıymy reıtıngisiniń úshinshi satysynda turǵan brazılııalyq Eskıva Falkaomen (30-0, 20 KO) jekpe-jek ótkizýge kelisti.
Bir kún buryn Falkao Álimhanulyna jekpe-jek ótkizýge kezekti usynys bildirdi. Jaýap retinde «Qazaq stıli» Falkaoǵa naqty usynys bolǵan jaǵdaıda Eskıvamen aıqasýǵa qarsy emes ekenin aıtyp, onyń komandasymen osyndaı jekpe-jekti talqylaýdy usyndy.
Sondaı-aq, qazaqstandyq boksshy Dáýren Eleýsinov (10-2-1, 9KO) Almatyda ótetin boks keshinde oıyn kórsetedi.
VKontakte áleýmettik jelisindegi «Qazaqstannyń kásipqoı boksy» paraqshasynda málim etilgendeı, boks keshi 2 qazan kúni Balýan Sholaq atyndaǵy Sport saraıynda ótedi.
Kanoedan eki medal aldy
Batysqazaqstandyq Marııa Brovkova kanoedan jastar arasynda Majarstannyń Seged qalasynda ótip jatqan álem chempıonatynda eki medal jeńip aldy.
Sportshynyń anasy ári jeke bapkeri Elena Brovkova málim etkenindeı, Marııa 18 jasqa deıingiler arasynda bul joly 500 metr qashyqtyqta bir adamdyq kanoeda qola júldege ıe boldy.
Qazaqstandyq sportshy qytaılyq jáne majarstandyq kanoeshydan keıin máre syzyǵyn úshinshi bolyp qıyp ótti.
Osylaısha, Marııa Brovkova álem chempıonatynda ekinshi medaline qol jetkizdi. Ol Qazaqstan tarıhynda tuńǵysh ret qyzdar arasynda álem chempıony atanǵan bolatyn.
