Ótken aptada tártip saqshylary 1 myń 738 qylmystyń 1 myń 319-ynyń izin sýytpaı ashty
ASTANA. Qarashanyń 2-si. QazAqparat /Aıdar Ospanalıev/ - Qazannyń 26-sy men 31-i aralyǵynda eldegi qylmystyq ahýal turaqty boldy. Apta ishinde elde 1 myń 738 qylmys jasalyp, onyń 1 myń 319-ynyń izi sýymaı ashyldy. Sondaı-aq buryn jasalǵan 402 qylmys áshekerelenip, izdeýde júrgen 95 adam qolǵa tústi.
Bul málimetterdi búgin aptalyq brıfıngte Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov málim etti, dep habarlaıdy QazAqparat.
Onyń derekterine qaraǵanda, apta ishinde tártip saqshylary sondaı-aq 10 atys qarýyn tárkilep, 159 esirtkimen baılanysty qylmysty áshkerelegen. Onyń 54 faktisi esirtkini saýdalaýmen baılanysty bolyp otyr. «Tárkilengen esirtki 80 keliden asady. Onyń 450 gramy geroın, 1,5 kelisi gashısh», dedi departament bastyǵy.
Ol keltirgen málimetter boıynsha, Qyzylordalyq polıtseıler «Qyzylorda-Amangeldi» tas jolynyń boıynda 34 jasar azamatty ustap, onyń kóliginen salmaǵy 38 kelini quraıtyn úsh qap marıhýana taýyp tárkilegen. Sondaı-aq tártip saqshylary elordada esirtki tasymaldaýmen aınalysyp júrgen qylmystyq toptyń kózin joıdy. Top músheleriniń barlyǵy qamaýǵa alynyp, olarǵa qatysty 9 qylmystyq is qozǵalyp otyr.
