Ótken aptada respýblıka aýmaǵynda 3 tonnaǵa jýyq esirtki tárkilendi - ІІM
ASTANA. 20 shilde. QazAqparat /Marlan Jıembaı/ - Ótken aptada respýblıka aýmaǵynda 3 tonnaǵa jýyq esirtki tárkilendi. Bul týraly búgin elordada QR ІІM Memlekettik til jáne aqparat departamentiniń basshysy Nurdildá Oraz málim etti.
Atap aıtqanda, «Kendir-2011» operatsııasy sheńberinde Jambyl oblystyq esirtki bıznesine qarsy kúres basqarmasynyń jáne «Delta-Dolına» óńiraralyq bóliminiń qyzmetkerleri Shý aýdanynda marıhýana daıyndap jatqan jerinen 41 jastaǵy Almaty qalasynyń turǵynyn ustady. Odan bir tonnadan astam (1146 keli) esirtki zaty tabylyp, alyndy. Shamamen osyndaı salmaqtaǵy esirtki zaty 54 jastaǵy Qyrǵyz Respýblıkasynyń azamatynan da tabylyp, tárkilendi. «Sonymen qatar Merke aýdanynyń polıtseıleri 58 jastaǵy Astana qalasynyń turǵynyn ustady. Odan jarty tonna (502 keli) jańa orylǵan marıhýana alyndy», - dedi ol.
N.Orazdyń atap ótýinshe, Almaty qalasyndaǵy úılerdiń biriniń jertólesinde polıtsııa qyzmetkerleri 39 jastaǵy qala turǵynynan 119 keli marıhýana tárkilegen. Ustalǵan azamat esirtki zatyn Jambyl oblysynan ákelgendigin aıtqan.
Aıta keteıik, respýblıka aýmaǵynda jyl saıyn maýsym-qazan aılary aralyǵynda «Kendir 2011» keń aýqymdy operatsııasy ótkiziledi. Onyń basty maqsaty - esirtkini daıyndaýdy, sondaı-aq Shý alqabynan esirtikini tasymaldaýdy anyqtaý jáne jolyn kesý, óńirlerde esirtikiniń kontrabandalyq arnalaryn joıý. Qazirgi ýaqytta negizgi magıstraldyq jáne jergilikti mańyzdaǵy avtojoldarda qosymsha beketter qurylyp, utqyr toptar qyzmet etýde.
