Ótken aptada polıtsııa qyzmetkerlerine kúsh kórsetýdiń birneshe faktisi tirkeldi

Bul týraly búgin aptalyq brıfıng barysynda QR ІІM resmı ókili Nurdildá Oraz málim etti.

«Ótken aptada qylmystyń jolyn kesý, qyzmettik mindetin atqarý kezinde polıtsııa qyzmetkerlerine qarsy kúsh kórsetýdiń birneshe faktisi tirkeldi», - dedi ol.

Máselen, resmı ókildiń aıtýynsha, Tarazda 102 pýltine habarlasqan 26 jastaǵy qala turǵyny belgisiz 4 mas adamnyń ózinen aqsha talap etkendigi jaıynda habarlaǵan. Oqıǵa oryn alǵan jerge jetken «Şıt-12» sholǵynshy ekıpajy 20-20 jas aralyǵyndaǵy 4 qala turǵynyn qolǵa túsirgen. «Degenmen ustaý kezinde kúdiktiler polıtsııa qyzmetkerlerine belsendi qarsylyq tanytqan. Qazirgi ýaqytta olar ýaqytsha oqshaýlaý ornyna qamaldy», - dedi ol.

Sonymen qatar Almaty oblysynyń Alakól aýdanyna qarasty Dostyq stansasynda túngi mezgilde polıtsııa qyzmetkerleri jol júrý erejesin buzǵan «Mersedes-Bents» markaly kólikti toqtatqan. Araqqa sylqııa toıǵan júrgizýshi men onyń jolaýshysy qujattaryn kórsetýden bas tartyp, tipti polıtsııa qyzmetkerine dene jaraqatyn salǵan. Olar da ýaqytsha oqshaýlaý ornyna toǵytyldy.