Ótken aptada Qazaqstanda úsh myńǵa jýyq qylmys jasalǵan – ІІM

ASTANA. QazAqparat – Ótken aptada Qazaqstan aýmaǵynda úsh myńǵa jýyq qylmys jasaldy, dep habarlaıdy QazAqparat tilshisi.

Bul týraly Іshki ister mınıstrliginiń onlaın-brıfıngisinde vedomstvo ókili Shuǵyla Turlybek málim etti.

«Aldymen eldegi krımınogendik jaǵdaıǵa toqtalaıyq. Bir apta ishinde 2918 qylmys jasaldy, onyń 1842-si táýlik ishinde ashyldy. Polıtsııa qyzmetkerleri «izin sýytpaı» 12 kisi óltirýdi, 6 ólimge ákep soqqan densaýlyqqa qasaqana aýyr zııan keltirýdi, 2 qaraqshylyq, 26 tonaý jáne 455 bóten múlikti urlaý qylmystaryn ashty», - dedi Shuǵyla Turlybek.

Sondaı-aq ótken aptada elimizdiń esirtkige qarsy kúres qyzmetkerleri 124 esirtkige qatysty quqyq buzýshylyq, onyń ishinde 16 ótkizý, 15 saqtaý, 2 kontrabanda, sondaı-aq 2 ósirý faktisin anyqtap, 1 prıtondy uıymdastyryp, ustaý faktisin tirkedi. Zańsyz aınalymnan shamamen 121 kg esirtki, onyń ishinde 6,5 kg sıntetıka tárkilengen.