Ótken aptada elde 1 myń 792 qylmys jasalyp, onyń 1 myń 389-ynyń izi sýymaı ashyldy
ASTANA. Qarashanyń 16-sy. QazAqparat /Aıdar Ospanalıev/ - Ótken aptada respýblıkadaǵy qylmystyq jaǵdaı turaqty boldy. Qarashanyń 8-i men 15-i aralyǵynda elimizde 1 myń 792 qylmys jasalyp, onyń 1 myń 389-ynyń izi sýymaı ashyldy.
Bul týraly búgin jýrnalıstermen bolǵan aptalyq brıfıngte Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov málim etti, dep habarlaıdy QazAqparat.
Onyń aıtýynsha, ótken aptada izdeýde júrgen 19 kúdikti qolǵa túsip, 6 atys qarýy tárkilengen. Sondaı-aq esirtkimen baılanysty 183 qylmys tirkelip, onyń 50 faktisi esirtkini taratýǵa qatysty bolǵan. Buǵan qosa 40 keliden astam esirtki tárkilenip, onyń 500 gramy geroın jáne 10 kelisi gashısh bolyp otyr. «Tártip saqshylary Almaty-Ekaterınbýrg baǵytynda ketip bara jatqan avtokólikti toqtatyp, ondaǵy Qostanaı azamatynan 10 keli marıhýana tapty. Al Soltústik Qazaqstan oblysyndaǵy kedendik beketterdiń birinen Omby qalasyna ketip bara jatqan Reseı azamaty ustalyp, odan 2 keli gashısh tabyldy. Esirtki tasymaldaýshy ony keýdesine japsyryp alypty. Bul fakti boıynsha qylmystyq is qozǵaldy. Soltústik Qazaqstan oblysynyń Qyzyljar aýdanyndaǵy Elıtnoe aýylynyń 36 jasar turǵynynyń úıinen ıisshil ıttiń kómegimen 1,5 keli gashısh tabyldy» dedi departament bastyǵy.
