Ótken aptada el sportynda bolǵan erekshe oqıǵalar
ASTANA. QazAqparat - Ótken aptada el sportynda birqatar eleýli oqıǵa boldy. Shaıbaly hokkeıden álem chempıonaty 2027 jyly Qazaqstanda ótkizilýi múmkin. Qazaqstandyq kásipqoı boksshy Gennadıı Golovkın meksıkalyq Saýl Alvarespen úshinshi jekpe-jegin ótkizdi. Kúres túrlerinen álem chempıonatynda qazaqstandyq balýandar 1 kúmis, 2 qola medal aldy. Qazaqstandyq tennısshiler Devıs kýboginde oıyn kórsetti. El sportyndaǵy ataýly oqıǵalarǵa QazAqparat tilshisi sholý jasaıdy.
Hokkeıden álem chempıonaty Qazaqstanda óte me?
Memleket basshysy Qasym-Jomart Toqaev Halyqaralyq hokkeı federatsııasynyń prezıdenti Lıýk Tardıfti qabyldady. Kezdesý barysynda sport ınfraqurylymdarynyń múmkindikterine erekshe nazar aýdaryldy. Osy rette Prezıdent elimizdiń 2027 jyly álem chempıonatyn ótkizýge joldaǵan ótinimi 2023 jyly mamyrdaǵy daýys berý kezinde qoldaý tapsa, Qazaqstannyń osy sharany uıymdastyrýǵa daıyn ekenin aıtty.
Qasym-Jomart Toqaev Halyqaralyq hokkeı federatsııasy óz tarıhynda Azııa qurlyǵynda eshqashan joǵary deńgeıdegi chempıonattar ótkizbegenin atap ótti. Halyqaralyq hokkeı federatsııasynyń prezıdenti kezdesýge múmkindik bergeni úshin Memleket basshysyna alǵys aıtyp, Qazaqstanda hokkeı sportyn damytýǵa kóńil bólinip jatqanyn joǵary baǵalady.
Gennadıı Golovkın ese qaıtara almady
Búgin Las-Vegastaǵy T-Mobile Arena stadıonynda ótken Gennadıı Golovkın men Saýl Alvares arasyndaǵy 12 raýndtyq boks jekpe-jegi tóreshilerdiń sheshimi boıynsha meksıkalyqtyń paıdasyna sheshildi.
«GGG» (42:1:1) men «Kanelo» (57:2:2) arasyndaǵy úshinshi kezdesý máresine jetti. Jeńimpaz – Saýl «Kanelo» Alvares.
Osylaısha, otandasymyz Gennadıı Golovkın kásipqoı bokstaǵy eń basty qarsylasy Saýl Alvaresten úshinshi kezdesýde de ese qaıtara almady.
Meksıkalyq boks sheberi WBA, WBC, WBO jáne IBF tujyrymdary boıynsha álem chempıony ataǵyn jeńip aldy. Sonyń arqasynda ol absolıýtti álem chempıony atanyp otyr.
Úkili úmitti úzdikter
Búgin Serbııa astanasy Belgrad qalasynda kúres túrlerinen álem chempıonaty máresine jetedi.
Aıta ketsek, erkin kúresten 86 keli salmaqta Azamat Dáýletbekov qolaǵa qol sozdy.
Azamat Dáýletbekov 1994 jyldyń 15 naýryzynda dúnıege kelgen. Buǵan deıin Azııa chempıonatynda 2022 jyly altyn alsa, 2018 jyly kúmis, 2017 jyly qola júlde aldy.
Eske salsaq, budan buryn áıelder kúresinen Jámıla Baqbergenova kúmis júlde aldy.
Jámıla Baqbergenova 1996 jyly 6 qańtarda dúnıege kelgen. Eresekter arasynda 2021 jyly Norvegııa astanasy Oslo qalasynda ótken álem chempıonatynda kúmis júldeger atanǵan bolatyn. Ol Azııa chempıonatynda 2020, 2022 jyldarda chempıon atansa, 2021 jyly kúmis, 2019 jyly qola aldy.
Sondaı-aq, grek-rım kúresinen Aıdos Sultanǵalı qola júldeger atandy.
Aıdos Sultanǵalı 1996 jyly 7 aqpanda Qyzylorda qalasynda dúnıege kelgen.
Buǵan deıin 2018 jyly Majarstan astanasy Býdapesht qalasynda ótken álem chempıonatynda da qola júlde alǵan edi.
Toptyq básekeden asa almady
Shotlandııanyń Glazgo qalasynda ótken Devıs kýboginiń toptyq básekesinde Qazaqstan quramasy Nıderland pen AQSh-qa jol berdi.
Sóıtip, 18 qyrkúıek kúni ótetin Qazaqstan - Ulybrıtanııa matchynyń nátıjesine qaramastan, amerıkalyqtar men nıderlandylyqtar shırek fınalǵa joldama aldy. Búgin olardyń ózara básekesinde D tobynda qaı komandanyń birinshi oryn alatyny belgili bolady.
Sondaı-aq, Qazaqstannyń juptyq syndaǵy birinshi raketkasy Anna Danılına Chehııanyń ıAblonets-nad-Nısoý qalasynda ótken ITF W25 týrnıriniń jeńimpazy atandy.
Foto: olympic.kz
