Ótken aptada birqatar áleýmettik mańyzy bar azyq-túlik taýarlary arzandady
ASTANA. KAZINFORM - Ulttyq statıstıka bıýrosynyń málimetinshe, 2026 jyldyń 26 tamyzy men 2 qyrkúıek aralyǵynda áleýmettik mańyzy bar azyq-túlik taýarlarynyń birqatar túri boıynsha baǵa turaqty boldy. Atap aıtqanda, makaron, taýyq eti, qaımaq, aıran, qııar jáne qant baǵasy ózgergen joq, dep habarlaıdy QR Saýda jáne ıntegratsııa mınıstrliginiń baspasóz qyzmeti.
Alty taýar túri boıynsha baǵa tómendedi. Pııaz 7,2%-ǵa, sábiz 4,6%-ǵa, kartop 3,2%-ǵa, qyryqqabat 3,1%-ǵa, alma 1,0%-ǵa, kúnbaǵys maıy 0,1%-ǵa arzandady.
19 taýar túri boıynsha baǵanyń azdap óskeni baıqaldy.
Eń joǵary ósim qyzanaqta tirkelip, onyń baǵasy 2,8%-ǵa qymbattady. Tuz 0,9%-ǵa, qaraqumyq jarmasy men jumyrtqa 0,7%-ǵa, qatty jáne jartylaı qatty irimshikter men súzbe 0,6%-ǵa ósti. Jylqy eti, onyń ishinde súıeksiz et, sondaı-aq tartylǵan et baǵasy 0,5%-ǵa, kúrish pen qara shaı 0,3%-ǵa qymbattady. Nan, qoı eti, onyń ishinde súıeksiz et, jáne balyq baǵasy 0,2%-ǵa, al un, súıekti jáne súıeksiz sıyr eti, taýyq eti (ushasy), sút jáne sary maı 0,1%-ǵa ósti.
Áleýmettik mańyzy bar azyq-túlik taýarlarynyń baǵasyn turaqtandyrý maqsatynda Qazaqstan Respýblıkasy Saýda jáne ıntegratsııa mınıstrliginiń Saýda komıteti tıisti memlekettik organdardyń jumysyn úılestiredi. Jalpy, Úkimet baǵa turaqtylyǵyn qamtamasyz etý úshin júıeli sharalar qabyldap keledi. Onyń ishinde zańnama talaptarynyń saqtalýyn baqylaý jáne ishki naryqty qajetti taýarlarmen qamtamasyz etý sharalary bar.
Baǵa qalyptasý tizbegindegi deldaldyq shemalardy tekserý jónindegi óńirlik komıssııalar ónimsiz deldaldardy anyqtaý jumystaryn jalǵastyrýda. 2026 jyldyń basynan beri óńirlerde 726 otyrys ótkizilip, 2 881 zańbuzýshylyq faktisi anyqtaldy jáne 2 695 ákimshilik hattama toltyryldy. Jumys nátıjesinde 186 ónimsiz deldal jetkizý tizbeginen shyǵaryldy. Salystyrý úshin, 2025 jyldyń ishinde 1 179 otyrys ótkizilgen.
Aýmaqtyq departamentter áleýmettik mańyzy bar azyq-túlik taýarlaryna belgilengen 15%-dyq saýda ústemesiniń saqtalýyna memlekettik baqylaý júrgizip otyr. Jyl basynan beri belgilengen saýda ústemesin asyrý faktileri boıynsha 3 155 ákimshilik qaýly shyǵaryldy. 2021 jyly mundaı qaýlylardyń sany 34 bolsa, 2022 jyly – 310, 2023 jyly – 760, 2024 jyly – 1 554, 2025 jyly – 2 796 boldy.
Sonymen qatar elektrondyq shot-faktýralarǵa taldaý júrgizilip keledi. Jyl basynan beri 36 664-ten astam jetkizý tizbegi taldanyp, onyń 5 391-i boıynsha Qazaqstan Respýblıkasynyń zańnamasyn buzý táýekelderi anyqtaldy.
2025 jyly 11,2 myń jetkizý tizbegine taldaý júrgizilip, olardyń 1,1 myńynda zańnama talaptaryn buzý táýekelderi anyqtalǵan.
Aqtóbe, Aqmola, Qyzylorda, Batys Qazaqstan, Shyǵys Qazaqstan, Pavlodar, Soltústik Qazaqstan oblystarynda, Abaı jáne Jambyl oblystarynda, sondaı-aq Astana men Almaty qalalarynda apta qorytyndysy boıynsha baǵa ındeksi 100,0% deńgeıinde saqtaldy.
Baǵa ındeksi tórt óńirde tómendedi: Ulytaý oblysynda – 0,3%-ǵa, Qostanaı oblysynda – 0,2%-ǵa, Qaraǵandy jáne Mańǵystaý oblystarynda – 0,1%-ǵa.
Osyǵan deıin Qazaqstannyń qaı óńirinde azyq-túlik arzan ekeni týraly saraptama daıyndadyq.
