Ótken aptada azyq-túlik baǵasynda qandaı ózgerister oryn aldy?
ASTANA. QazAqparat - 2015 jyldyń 17-24 aqpany aralyǵynda «Qazagromarketıng» AQ-nyń el aımaqtary boıynsha azyq-túlik baǵalaryna monıtorıng júrgizgen.
«Jemis-kókónis ónimderi arasynda kelesi ózgerister baıqaldy: Shymkentte júzim baǵasy 11%-ǵa, 450-den 500 teńge/kg-ǵa deıin, Aqtaýda 11%-ǵa, 540-tan 600 teńge/kg-ǵa deıin, Astanada 10%-ǵa, 831-den 911 teńge/kg-ǵa deıin qymbattady.
Atyraýda qııar 14%-ǵa, 380-nen 435 teńge/kg-ǵa deıin, Óskemende 14%-ǵa, 502-den 573 teńge/kg-ǵa deıin joǵarylasa, Astanada tátti burysh baǵasy 14%-ǵa, 689-dan 788 teńge/kg-ǵa deıin kóterilgen», - delingen habarlamada.
Ónimniń qymbattaýyna ákelinetin ónim mólsheriniń azaıýy men kóterme saýda baǵalarynyń ulǵaıýy áser etken.
«Mandarınder Almatyda 22%-ǵa, 344-ten 270 teńge/kg-ǵa deıin jáne Atyraýda 14%-ǵa, 416-dan 359 teńge/kg-ǵa deıin arzandady. Ónim baǵasynyń tómendeýine saýdada arzanyraq pákistandyq mandarınder mólsheriniń artýy sebep boldy. Satýshylardyń kóterme saýda baǵasyn 12%-ǵa, 425-ten 375 teńge/kg-ǵa arzandatýyna baılanysty Astanada shortan baǵasy 10%-ǵa, 500-den 450 teńge/kg-ǵa deıin tómendedi», - dep jazady kompanııanyń baspasóz qyzmeti.
Ózge azyq-túlik ónimderiniń baǵasy aıtarlyqtaı (10%-dan artyq) ózgergen joq. «Qazagromarketıng» AQ apta saıyn ár seısenbi kúni azyq-túlik ónimderiniń 66 túri boıynsha elimizdiń barlyq oblys ortalyqtary men Astana, Almaty qalalarynda baǵa monıtorıngin ótkizedi.
Esterińizge salar bolsaq, kompanııa baǵa monıtorıngin 2003 jyldan bastap júzege asyryp keledi. 2008 jyldan bastap bul jumys «Oblys ortalyqtary men Astana jáne Almaty qalalarynda negizgi azyq-túlik baǵalaryna monıtorıng júrgizý ádistemesine» sáıkes júzege asyrylýda. Bul ádisteme QR Indýstrııa jáne saýda mınıstrligi men QR Aýyl sharýashylyǵy mınıstrliginiń birlesken buıryǵymen bekitilip, QR Statıstıka jónindegi agenttigimen maquldanǵan.
