Ótken aptada azyq-túlik baǵasy aıtarlyqtaı arzandady
ASTANA. QazAqparat - «Qazagromarketıng» AQ-nyń el aımaqtary boıynsha azyq-túlik baǵalaryna júrgizgen monıtorıngi 2015 jyldyń 10-17 aqpany aralyǵynda bólshek saýda baǵalarynyń birshama ózgerisin anyqtady. Bul týraly kompanııanyń baspasóz qyzmetinen habarlandy.
Atalǵan merzim aralyǵynda azyq-túlik ónimderiniń baǵasy kelesideı tómendedi:
- Aqtóbede kúrish 10 paıyzǵa, kelisi 212 teńgeden 190 teńgege deıin arzandady. Buǵan naryqtyń ónimmen tolyǵýy men satýshylardyń kóterme baǵany 6 paıyzǵa 180 teńgeden 170 teńge deıin azaıtýy sebep boldy; - Astanada tary jarmasy 13 paıyzǵa, 159 teńgeden 138 teńgege deıin arzandady, oǵan satylymda arzanyraq qaptan ólshenip satylatyn ónimniń kóbeıýi sebep bolǵan; - Astanada úrmeburshaq 20 paıyzǵa, bir kelisi 482 teńgeden 388 teńgege deıin arzandady. Bul «Shapaǵat» jabyq bazarynda arzanyraq qaptan ólshenip satylatyn baǵasy kelisine 230 teńge quraıtyn úrmeburshaqtyń satylýymen jáne munyń ortasha baǵaǵa áser etýimen baılanysty, ónimniń kóterme saýda baǵasy bir kelisine 280 teńge deńgeıinde qaldy. Kókshetaýda 1-sanatty taýyq jumyrtqasy 11 paıyzǵa, on danasyna 180 teńgeden 160 teńgege deıin arzandady. Qarastyrylyp otyrǵan kezeń aralyǵynda Shymkentte úrmeburshaq 16 paıyzǵa, bir kelisine 284 teńgeden 330 teńgege deıin qymbattady. Ortasha baǵanyń kóterilýine satylymda qymbatyraq oramadaǵy ónim úlesiniń basym bolýy áser etken, al kóterme saýda baǵasy kelisine 310 teńge deńgeıinde qaldy. Kókónis-jemis ónimderiniń baǵasy mynadaı ózgeristerge ushyrady: - Qaraǵandyda júzim 36 paıyzǵa, kelisine 515 teńgeden 701 teńgege deıin qymbattady.Qymbattaýǵa monıtorıng kúni kóterme saýda bazaryna ónimniń ákelinbeýi men satylymdaǵy júzim kóleminiń azaıýy sebep bolǵan; - Shymkentte sábiz11 paıyzǵa, ıaǵnı bir kelisi 90-nan 80 teńgege deıin arzandady. Arzandaýǵa halyq suranysynyń azaıýy men bólshek saýdadaǵy satýshylardyń ústeme baǵany tómendetýi sebep boldy, kóterme baǵa bolsa, sábizdiń bir kelisi 70 teńge deńgeıinde saqtalyp qaldy; - Aqtóbede mandarın 10 paıyzǵa, bir kelisi 258 teńgeden 232 teńgege deıin arzandady. Baǵa tómendeýine naryqtyń Reseıden ákelingen ónimmen tolyǵýyna jáne kóterme saýda baǵasynyń 10 paıyzǵa, kelisine 210 teńgeden 190 teńge deıin arzandaýy sebep bolǵan; - Astanada baıaldy (baklajan) baǵasy 15 paıyzǵa, kelisi 570 teńgeden 658 teńgege deıin qymbattady. Buǵan satylymdaǵy ónim kóleminiń azaıýy men kóterme saýda baǵasynyń 33 paıyzǵa, kelisine 450 teńgeden 600 teńgege deıin artýy sebep boldy. Ózge azyq-túlik ónimderiniń baǵasy aıtarlyqtaı (10%-dan joǵary) ózgergen joq. Eske sala keteıik, «Qazagromarketıng» AQ apta saıyn ár seısenbi kúni azyq-túliktiń 66 túri boıynsha elimizdiń barlyq oblystary men Astana, Almaty qalalarynda baǵa monıtorıngin ótkizedi.
