Ótken aptada Almatyda júrgizilgen reıd barysynda 61 zańsyz saýda oryndary joıyldy
ALMATY. 4 shilde. QazAqparat /Názıra Eleýhan/ - Almatyda zańsyz saýda oryndarymen kúres jalǵasýda. Ótken aptada qalanyń sanıtarlyq-epıdemıologııalyq qyzmeti men aýdandyq ІІD qyzmetkerleri taǵy da jabaıy saýdamen kúreske shyǵyp, reıd júrgizdi.
Reıd barysynda taǵy da zańsyz jumys istep turǵan alty dúńgirshek anyqtaldy: 4-eýi - Almaly aýdanynda, 2-eýi - Túrksib aýdanynda. Qazirgi ýaqytta áli de usaq-bólshek jelisindegi 54 nysan jumys isteýde.
Ótken aptada jedel toptyń kúshimen 61 zańsyz saýda oryndary joıyldy.
Sanıtarlyq-epıdemıologııalyq qyzmet sonymen qatar, qalanyń 7 bazaryna reıd júrgizdi. Onyń nátıjesinde «Bolashaq», «Qulager», «Juldyz», «Tastaq», «Kárim», «Botagóz» bazarlary aınalasyndaǵy 25 jabaıy saýda oryndary joıyldy.
