Ótken aptada áleýmettik mańyzy bar azyq-túlik baǵasy tómendedi
ASTANA. KAZINFORM – Ótken aptada áleýmettik azyq-túlik baǵasynyń ortasha ındeksi 0,1%-ǵa tómendep, jyldyq ósý qarqynyn nólge túsirdi. Mundaı derekter vıtse-premer Serik Jumanǵarınniń tóraǵalyǵymen áleýmettik mańyzy bar azyq-túlik taýarlarynyń (ÁMAT) baǵasyn turaqtandyrý jónindegi keńeste aıtyldy.
Naryqtyq faktorlardyń yqpalyna qaramastan, ÁMAT baǵasynyń ósýin nóldik deńgeıde ustap turýǵa múmkindik týdy. Jedel ári júıeli sharalar qabyldaı otyryp, azyq-túliktiń 19 túriniń árqaısysyna baǵanyń eń tómengi ósýiniń sebepterin egjeı-tegjeıli taldaıtyn óńirlermen maýsymdyq jáne apta saıynǵy úkimettegi keńester ÁMAT baǵasynyń ósýin nóldik dálizde ustap turýǵa múmkindik beredi.
Saýda jáne ıntegratsııa birinshi vıtse-mınıstri Aıjan Bıjanova kókónis baǵasynyń maýsymdyq tómendeýi bastalǵanyn habarlady. Ótken aptada sábizdiń baǵasy 1,1%-ǵa, kartop – 0,6%-ǵa arzandady. Taýyq jumyrtqasy (-0,5%), kúrish (-0,2%), qant (-0,3%), aıran (-0,4%), qaraqumyq jarmasy (-0,2%), birinshi sortty nan men un (- 0,1%), sıyr eti (-0,1%) baǵasynyń tómendeýi jalǵasýda. Sonymen qatar kúnbaǵys maıynyń quny uzaq ýaqyt tómendeýinen keıin 0,5%-ǵa, tuz (0,2%), maı (0,3%) ósýi baıqaldy.
Aldaǵy ýaqytta Qazaqstanǵa bıdaı ımportyna tolyq tyıym salýdyń engizilýine baılanysty vıtse-premer Azyq-túlik korporatsııasyna qazaqstandyq jáne reseılik bıdaı arasyndaǵy un tartqyshtar úshin baǵa teńgerimin teńestirý jóninde sharalar qabyldaýdy tapsyrdy. Sonymen qatar fermerlerdiń Qytaı tarapynan bıdaı ımportyn toqtata turý týraly shaǵymdaryn eskere otyryp, Serik Jumanǵarın aýyl sharýashylyǵy mınıstrligine osy másele boıynsha QHR-men kelissózder júrgizý múmkindigin pysyqtaýdy tapsyrdy.
