Ótken aptada 50-ge jýyq adam jol apatynan mert boldy

NUR-SULTAN. QazAqparat – 1 apta ishinde elimizdiń joldarynda kólik apatynan 50-ge jýyq adam mert boldy. Bul týraly ІІM Ákimshilik polıtsııa komıteti tóraǵasynyń orynbasary Jandos Muratálıev aıtty, dep habarlaıdy QazAqparat tilshisi.

«Jyl basynan beri jol apattarynda myńnan astam adam qaza taýyp, 8 myńnan astam azamat jaraqat aldy. Kún saıyn elimizdiń joldarynda 7-ge jýyq adam qaza taýyp, 70-ke tarta adam túrli dene jaraqattaryn alyp jatady. Tek ótken aptada ǵana vedomstvolyq málimetterge sáıkes, elimizde 200-den astam jol-kólik oqıǵasy tirkeldi, onda 50-ge jýyq adam qaza taýyp, 200-den astam adam jaraqat aldy», - dedi Jandos Muratálıev ІІM baspasóz qyzmeti alańynda ótken brıfıngte.

Onyń aıtýynsha, kámeletke tolmaǵan jasóspirimderdiń qatysýymen bolatyn oqıǵalar erekshe alańdaýshylyq týdyrady. Jyl basynan beri 2 myńǵa jýyq bala túrli jaraqat alyp, 90-nan astamy qaıtys boldy.

«Jol apattaryn taldaý barysynda olardyń negizgi sebepteri jyldamdyq rejımin asyrý, manevr jasaý erejelerin buzý, qarama-qarsy júris jolaǵyna shyǵý, aýdarylý, jaıaý júrginshilerdi basyp ketý bolyp otyr», - dedi komıtet tóraǵasynyń orynbasary.