Ótken aptada 12 sheneýnik ustaldy - Sybaılas jemqorlyqqa qarsy qyzmet agenttigi

NUR-SULTAN. QazAqparat – Ótken aptada QR Sybaılas jemqorlyqqa qarsy qyzmet 100 sotqa deıingi tergeý amalyn tirkedi. Bul týraly QR Sybaılas jemqorlyqqa qarsy is-qımyl agenttiginiń jedel tergeý qyzmetiniń nátıjeleri týraly ótken onlaın brıfıngte aıtyldy, dep habarlaıdy QazAqparat tilshisi.

«Ótken aptada QR Sybaılas jemqorlyqqa qarsy qyzmet 100 sotqa deıingi tergeý amalyn tirkedi. 12 sheneýnik ustaldy. 15-ke jýyq qylmystyq oqıǵa birqatar oblystardaǵy jergilikti atqarýshy organdarda, atap aıtqanda jer qatynastary jáne qurylys, densaýlyq saqtaý salasynda bolǵan. Mańǵystaý, Soltústik Qazaqstan jáne Shyǵys Qazaqstan oblystarynda bilim berý salasynda sotqa deıingi segiz tergeý tirkeldi», - deıdi QR Sybaılas jemqorlyqqa qarsy is-qımyl agenttigi seriktestik departamentiniń sarapshysy Syrym Elýbaev.

Onyń aıtýynsha, Іshki ister organdarynyń qyzmetkerlerine, onyń ishinde qylmystyq-atqarý júıesi salasyndaǵy is-áreketterge qatysty, Aqtóbe, Qaraǵandy, Atyraý, Qostanaı, Túrkistan, Pavlodar, Shyǵys Qazaqstan jáne Batys Qazaqstan oblystarynda 30-ǵa jýyq sotqa deıingi tergeý amaldary júrip jatyr.

«Al Soltústik Qazaqstan jáne Atyraý oblystarynda kóliktik baqylaý salasyndaǵy sotqa deıingi tergeýler tirkeldi. Ótken aptada 11 sot úkimi shyǵaryldy, olardyń ekeýi tótenshe jaǵdaı kezinde karantın rejımin buzǵany úshin para alý boıynsha. Para bergen úsh memlekettik mekemeniń basshysy, bir sýdıa, ár túrli deńgeıdegi eki ákim, ákimdikterdiń eki bas mamany, ishki ister organdarynyń bir qyzmetkeri jáne eki adam sottaldy», - dep atap ótti ol.