Ótken alty aıda áskerı sottar qaraǵan ister byltyrmen salystyrǵanda 24,3 paıyzǵa az boldy
ASTANA. QazAqparat - Qazaqstan Respýblıkasyndaǵy áskerı sottarǵa 2015 jyldyń alty aıynda 23 azamattyq is, 1307 shaǵym kelip tústi. Bul ótken jyldyń osy kezeńimen salystyrǵanda 24,3 paıyzǵa az. Bul týraly búgin QR Áskerı sotynyń tóraǵasy Sáken Abdýllaev málim etti.
Tóraǵanyń aıtýyna qaraǵanda, osy kezeńde 1258 azamattyq is qozǵalyp, 939 is qaralyp, sheshim shyqty. Bul kórsetkish te byltyrǵy jylǵa qaraǵanda 15,8 paıyzǵa tómen.
«Jańa tehnologııalardyń engizilýine baılanysty 2015 jyldyń alǵashqy toqsanynda 391 elektrondy aryz-shaǵym kelip túsip, olar óndiriske alyndy. Sot óndirisinde birinshi ınstantsııada jatqan 1416 azamattyq istiń 1113-i qaralyp bitti. Bul kórsetkish te byltyrǵyǵa qaraǵanda 20 paıyzǵa, ıaǵnı 311 azamattyq iske az», - dedi S.Abdýllaev.
Aıta keterligi, 2015 jyldyń ótken alty aıynda qaralǵan azamattyq isterdiń basym bóligi turǵyn úıge qatysty daýlardy qurap otyr. Onyń ishinde jekeshelendirilmegen baspana úshin ótemaqy tóleý, jaýapty laýazymdy tulǵalardyń áreketine shaǵymdaný, jekeshelendirýge berýden bas tartý boıynsha memelkettik organdardyń ústinen shaǵymdaný sekildi aryzdar bar. Budan bólek, eńbek daýlary da qaralǵan isterdiń basym bóligin quraǵan.
