Ótken alty aıda 500-den astam adam alaıaqtyq boıynsha sotty boldy

Bul týraly búgin QR Joǵarǵy Sotynyń  aǵymdaǵy jyldyń birinshi jartyjyldyǵyn qorytyndylaýǵa arnalǵan brıfıng barysynda resmı ókil Oksana Peters málim etti.

Resmı ókildiń aıtýynsha, QR Qylmystyq kodeksiniń 177-baby, ıaǵnı alaıaqtyq boıynsha qylmystyq jaýapkershilikke tartylǵandar sany byltyrǵyǵa qaraǵanda birshama tómendegen. «Statıstıkalyq derekterge sáıkes, 2012 jyldyń birinshi jartyjyldyǵynda alaıaqtyq baby boıynsha 509 tulǵa sotty boldy. Al ótken jyly dál osy kezeńde týra osyndaı bappen sottalǵandar sany 793 adamdy quraǵan edi. Sondyqtan da, esepti kezeńde atalmysh bap boıynsha sottalǵandar sany 284 tulǵaǵa az bolyp tabylady», - deıdi O. Peters.

Onyń aıtýynsha, alaıaqtyq boıynsha sottalǵandar az bolǵanymen, olar keltirgen shyǵyn mıllıondap sanalady. «Mysal retinde aıtar bolsaq, Qaraǵandy oblysynyń bir azamatshasy bir jyl boıy aldaý nemese senimge qııanat jasaý arqyly 19 mln. teńge bolatyn bótenniń múlkin urlaǵan. Ol ártúrli syltaýmen qurbylaryn aldap, solardyń attaryna bankten nesıe alýǵa kóndirgen», - deıdi resmı ókil.