Ótken 6 aıda alqa bıler sotymen 183 qylmystyq is qaralyp, qylmys quramynyń joqtyǵyna oraı 39 adam aqtalǵan
TANA. 28 shilde. QazAqparat /Qanat Mámetqazyuly/ - Ótken 6 aıda alqa bıler sotymen 183 qylmystyq is qaralyp, qylmys quramynyń joqtyǵyna oraı 39 adam aqtalǵan. Bul týraly búgin QR Joǵarǵy sotynyń tóraǵasy Bektas Beknazarov jýrnalıstermen resmı baspasóz máslıhatyn ótkizý barysynda málim etti.
«Aǵymdaǵy jyldyń 6 aıy boıynsha respýblıkanyń alqa bıler sotymen 183 qylmystyq is qaralǵan. Bul ótken jylǵy kezeńmen salystyrǵanda alqa bıler sotymen qaralatyn isterdiń birden artqanyn kórsetedi. Toqtala ketetin jaıt, negizinen alqa bıler soty asa aýyr qylmystar boıynsha qylmystyq jaýapkershilikke tartylǵan sottalýshynyń tilegine oraı júzege asady. Sondyqtan da sońǵy kezderi asa aýyr qylmystardyń alqa bıler sotymen qaralý sany da artyp otyr. Máselen, ótken alty aıda qaralǵan 183 qylmystyq is boıynsha 248 adam sottalsa, 39 adamdy alqa bıler qylmys quramynyń joqtyǵyna baılanysty aqtaǵan», - dedi tóraǵa B. Beknazarov.
Joǵarǵy Sot tóraǵasynyń aıtýynsha, alqa bıler soty kóbinese aqtaýshy úkimderdi shyǵarýǵa beıim. Bunda negizinen qylmysty baǵalaý sýdıamen ǵana emes, alqa bılermen de jasalady. «Qazirgi ýaqytta alqa bıler qaraýyna asa aýyr qylmystardy ǵana emes, aýyr qylmystardy da berý týraly máseleler kóterilip otyr. Degenmen, bul másele bolashaqta keńinen talqylanatyn bolady»- dedi B. Beknazarov.
