Ótken 5 aıda ónerkásip óndirisiniń kólemi 11,9 paıyzǵa artty

Statıstıka agenttiginiń málimetterine súıensek, 2010 jylǵy qańtar-mamyr aılarynda 2009 jyldyń osy kezeńimen salystyrǵanda temir kenin, shıki munaıdy, tabıǵı gazdy, kómirdi óndirý kórsetkishteri birshama artqan. Budan bólek, azyq -túlik taǵamdaryn óndirý men munaı ónimderin óńdeý, qurylys materıaldaryn shyǵarý, metallýrgııa men hımııalyq ónerkásip ónimderin shyǵarý kórsetkishteri de joǵarylap otyr.

Óndiristiń ósý deńgeıi elimizdiń barlyq óńirlerinde baıqalǵan.

Atap aıtqanda, 2010 jyldyń qańtar-mamyr aılarynda jekelegen taýar túrleri boıynsha, onyń ishinde gaz kondensatyn qosa alǵandaǵy munaı 32,8 mln. tonna shamasynda óndirilse, bul ótken jylǵy sáıkes kezeńmen salystyrǵanda 107,3 paıyzdy quraıdy. Sonymen birge, esepti kezeńde un óndirý 1,5 mln. tonnaǵa jetip, 113,4 paıyzdy qurady. Benzın óndirý 1,4 mln. tonna deńgeıinde bolsa, bul ótken jylǵy osy kezeńmen salystyrǵanda 132,5 paıyzǵa teń bolyp otyr.