Ótken 30 jylda Senat asa mańyzdy tarıhı mıssııasyn abyroımen atqaryp shyqty — Prezıdent

ASTANA. KAZINFORM — Ótken 30 jylda Senat asa mańyzdy tarıhı mıssııasyn abyroımen atqaryp shyqty. Bul týraly Memleket basshysy Qasym-Jomart Toqaev Qazaqstan halqyna Joldaýynda aıtty.

— Búgin men elimizdiń jasandy ıntellekt negizinde áleýmettik-ekonomıkalyq damýyna aıtarlyqtaı oń yqpalyn tıgizetin jańa saıası reforma týraly oıymdy ortaǵa salǵym keledi. Bul jerde parlamenttik reforma týraly aıtqaly turmyn. Joǵary ókildi bılik tarmaǵyna qatysty reformany buǵan deıingi barlyq ózgeristiń, sonyń ishinde Prezıdent bıligine qatysty ózgeristerdiń zańdy jalǵasy deýge bolady. Biz Ádiletti Qazaqstandy qurýǵa kiristik. «Halyq únine qulaq asatyn memleket» qaǵıdatyna sáıkes bılik pen halyqtyń arasynda ashyq ári búkpesiz dıalog ornatyp jatyrmyz. 2022 jyly maýsym aıynda elimizde jalpyulttyq referendým ótti. Onda azamattarymyzdyń basym kópshiligi «Kúshti Prezıdent — yqpaldy Parlament — esep beretin Úkimet» tujyrymdamasy negizinde memleketimizdi jan-jaqty jańǵyrtý strategııasyna qoldaý bildirdi, — dedi Prezıdent.

Memleket basshysynyń paıymynsha, sońǵy jyldary Qazaqstanda, tipti, shetelderde bolyp jatqan oqıǵalardyń ózi biz tańdaǵan baǵdardyń durys ekenin kórsetip berdi.

— Degenmen bir jerde toqtap qalýǵa bolmaıdy. Biz elimizdiń jáne keıingi urpaqtyń bolashaǵyn tereńnen oılaýymyz kerek. Meniń jyldyń basynda «Ana tili» gazetine aýqymdy suhbat bergenimdi bilesizder. Onda «Reforma — udaıy júretin úderis, qoǵamda naqty suranys bolsa, jańa reformalar ázirlenedi» dep aıttym. Elimizde parlamenttik reforma máselesi keminde jıyrma jyldan astam ýaqyt boıy aıtylyp keledi. Osy másele ashyq ta, jabyq ta talqylanyp júrgeni eshkimge qupııa emes. Bul taqyryp áli kúnge deıin ózekti bolyp otyr. Sondyqtan memlekettik júıe damyp, azamattarymyzdyń saıası mádenıeti ósip kele jatqanyn eskere otyryp, bul máseleni halyqtyń talqysyna salý aıryqsha mańyzdy dep sanaımyn, — dedi Qasym-Jomart Toqaev.

Prezıdent Senat 1995 jyly elimizde kúrdeli ári turaqsyz saıası jaǵdaı bolyp turǵan sátte Parlamenttiń joǵary palatasy retinde qurylǵanyn eske saldy.

— Ol kezde memlekettigimizdiń negizi endi ǵana qalyptasa bastaǵan asa qıyn joldyń basynda turǵan edik. Senatqa memleket qurý isindegi turaqtylyqty qamtamasyz etý tarıhı mindeti júkteldi. Ótken 30 jylda Senat óziniń osy asa mańyzdy tarıhı mıssııasyn abyroımen, tıimdi atqaryp shyqty. Joǵary palata zań shyǵarý úderisiniń, basqa da negizgi reformalardyń aıryqsha mańyzdy tetigi ári kepili bolyp keledi, — dedi Qasym-Jomart Kemeluly.

Aıta keteıik, búgin Prezıdent bir palataly Parlament qurý úshin 2027 jyly jalpyulttyq referendým ótkizýdi usyndy.