Ótken 11 aıda elimizde jol-kólik oqıǵalarynan 2 myńnan astam adam qaza tapty - QR ІІM
ASTANA. QazAqparat - Qazaqstanda aǵymdaǵy jyldyń 11 aıynda jol-kólik oqıǵalarynan 2 myń 235 adam qaza tapty. Búgin Májilistiń jalpy otyrysynda depýtattar saýalyna jaýap bergen QR Іshki ister mınıstri Qalmuhanbet Qasymov osylaı málim etti.
Mınıstrdiń málimetine qaraǵanda, 2015 jyldyń ótken 11 aıynda Qazaqstanda 17 283 jol-kólik oqıǵasy tirkelip, onyń saldarynan qaza bolǵandar sany 2 235 adamdy quraǵan. Sonymen qatar jol apatynan 22 myńnan astam adam jaraqat alǵan. «Bul kórsetkishter byltyrǵy jol-kólik oqıǵalaryna qaraǵanda 6,7 paıyzǵa tómen, al qaza bolǵandar sany 5,7 paıyzǵa, jaraqat alǵandar sany 6,2 paıyzǵa az. Qoldanystaǵy zań qabyldanǵannan soń, 2014 jyly joldaǵy kólik apattary birshama azaıdy. Nátıjesinde qaza tapqandar men jaraqat alǵandar kórsetkishi de tómendep otyr. ıAǵnı, zań óz nátıjesin berýde, joldaǵy ahýalǵa oń septigin tıgizip jatyr», - deıdi mınıstr Qasymov. Onyń paıymynsha, qazirgi ýaqytta jol-kólik oqıǵalary negizinen avtokólikter sanynyń artýyna baılanysty oryn alyp otyr. «Qazirgi tańda elimizde 4 mln 483 myń avtokólik bar, bul rette kólik quraldarynyń sany sońǵy 7-8 aıda 400 myńǵa artqan. Ekinshiden, qoldanystaǵy avtokólikterdiń 20 paıyzynyń tozyǵy jetken», - dedi mınıstr.
