Ótken 10 aıda prokýrorlar tergeýdiń 329 myń qaýlysyn tekserdi
Bul týraly Májilistiń jalpy otyrysynda prokýratýra jáne sot arasynda ókilettikterdiń jáne jaýapkershilik aımaqtarynyń arajigin ajyratýǵa qatysty zań jobasyn qaraý kezinde QR Bas prokýrorynyń orynbasary Áset Shyndalıev aıtty, dep habarlaıdy QazAqparat tilshisi.
«Qylmystyq protseske úsh býyndy modeldi engizý boıynsha túzetýler týraly zań jobasy Prezıdent Joldaýlarynda bergen tapsyrmalardy júzege asyrýǵa baǵyttalǵan. Memleket basshysy 2020 jyly úsh býyndy modeldi engizýdi tapsyrdy. 2021 jyly prokýrorlardyń aıyptaý aktilerin daıyndaý jónindegi quzyretin keńeıtý qajet dedi. Ótken jyldyń aıaǵynda Parlament tergeýshiniń negizgi sheshimderin prokýrormen kelisý týraly zań qabyldady. Mundaı kelisý qylmystyq protsestiń úsh býyndy modeline kóshýdiń birinshi kezeńi bolyp sanalady. Bul tártip úlgi retinde Eýropa elderinen alyndy. Osy jyldyń basynan bastap tergeý organdarynyń kúdikti dep taný, áreketterdi saralaý, tergeý merzimderin úzý, isti toqtatý týraly sheshimderin tek prokýror zańdastyrady. Prokýror kelisim bermese, olar zańsyz bolyp sanalady», - dedi Áset Shyndalıev.
Onyń aıtýynsha, elektrondy is júrgizýdi engizý - protsesti jedel ári jeńil etýge múmkindik berdi. Tergeýshi isti prokýrorǵa joldaıdy, ol óz qaýlysyn júıede ázirlegen kezde, prokýrorǵa birden elektrondy habarlama túsedi. Sonymen qatar, prokýrordyń sheshim qabyldaý merzimi de qysqardy. Buryn ister bir aı qaralsa, al qazir 24 saǵattan úsh kúnge deıin qaralady. Sheshim zańdy bolǵanda prokýror olarǵa tsıfrly qol qoıyp, kelisedi. Al zańsyz bolsa, bas tartady.
«Ótken 10 aıdyń ishinde prokýrorlar tergeýdiń 329 myń qaýylysyn tekserip, 287 myń sheshimge kelisim berdi. Qalǵan sheshimder qoldaý tappady jáne túzetý úshin qaıtaryldy», - dedi Bas prokýrordyń orynbasary.
