Ótkelde synǵan K-700 traktoryn poıyzdyń kelýine 15 mınýt qalǵanda shyǵardy
PETROPAVL. QazAqparat – Soltústik Qazaqstan oblysy Aqqaıyń aýdanynda temirjol ótkelinen ótip bara jatqan traktor synyp, bir saǵatqa joldy japty, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, oqys oqıǵa 9 qyrkúıek kúni saǵat 21.05-te bolǵan. Aqqaıyń aýdandyq polıtsııa bólimine Qııaly men Smırnovo eldi mekenderiniń arasyndaǵy «Jańajol» temirjol ótkelinde K-700 traktorynyń synyp turǵany jaıynda habar túsedi.
Traktordyń rýlinde aýdandaǵy JShS biriniń 38 jastaǵy traktorshysy eki tirkeme bıdaıdy aýdan ortalyǵyna apara jatqan. Alaıda temirjoldy kesip ótken kezde tirkemesiniń biriniń
artqy dońǵalaǵynyń shúldigi (os) synyp ketken. Saldarynan synǵan shúldik ótkeldiń rezeńke jabyndysyna kirip, traktordyń qozǵalýyna kedergi keltirgen.
«Temirjoldyń dál osy ýchaskesi arqyly jolaýshylar poıyzy jıi ótedi. Sol sebepti tez arada joldy bosatý qajet boldy. Temirjolshylar, sharýashylyq jumysshylary K-700-di súırep shyǵaryp jatqanda, tártip saqshylary jol qozǵalysynyń qaýipsizdigin qadaǵalady. Saǵat 22.10 mınýt ketkende traktor joldan alyndy, al 15 mınýttan keıin ol jerden esh kedergisiz «Almaty-Petropavl» baǵytyndaǵy 15- poıyz ótti», - deıdi polıtseıler.
Temirjolshylar ótkeldegi zaqymdalǵan rezeńke jabyndyny aýystyrdy. Al tekserý barysynda K-700 traktory júrgizýshisiniń kólikti basqarýǵa ruqsat beretin qujattary bolmaı shyqty.
Tártip saqshylary oǵan temirjol ótkelin zaqymdaǵany úshin de ákimshilik is jınap, materıaldy sotqa berýge ázirlep jatyr.
