Ótirik aıtqan semeılik 7 mln teńge aıyppul tóleıdi
SEMEI. QazAqparat - Semeıde telefonymdy urlap ketti dep polıtsııaǵa jalǵan aqparat bergen boıjetken qylmystyq jaýapkershilikke tartyldy. Bul týraly QazAqparat oblystyq ІІD baspasóz qyzmetine silteme jasap habarlaıdy.
19 jastaǵy qala turǵyny Ortalyq polıtsııa bólimine kelip, qoǵamdyq kólikte uıaly telefonyn belgisiz bireýlerdiń urlap ketkenin aıtyp, aryz bergen. Shyǵyn kólemi 40 myń teńge.
«Jedel izdestirý sharalary kezinde polıtsııa qyzmetkerleri qyzdyń bergen aqparatynyń jalǵan ekenin anyqtady. Keıin qyzdy tergeý kezinde ol kinásin tolyq moıyndady. Boıjetken 3 shilde kúni tańerteń uıaly telefonyn ózi satyp jibergen» delingen habarlamada.
Qazir onyń ústinen QR Qylmystyq kodeksiniń 419-baby 2-tarmaǵy boıynsha (Kórineý jalǵan sóz jetkizý) iz qozǵaldy. Endi ol zańsyz áreketi úshin 3000 aılyq eseptik kórsetkishke deıingi mólsherde aıyppul tóleıdi. ıAǵnı, 7 mln 215 myń teńge nemese úsh jylǵa deıingi merzimge bas bostandyǵynan aıyrylady.
