«Otyrǵan ornymnan ushyp turdym»: UBT-dan 140 ball jınaǵan Jannur Eńsebek

QONAEV. KAZINFORM – Ulttyq biryńǵaı testileý ótkizýdiń altynshy aptasynda Almaty oblysynyń túlegi eń joǵary 140 baldy jınady. Mundaı kórsetkish sońǵy ret elde 2021 jyly tirkelgen. Maksımaldy mejege qol jetkizgen túlek Kazinform tilshisine testke qalaı daıyndalǵany týraly aıtyp berdi.

Jannur Eńsebek - Almaty oblysynyń Talǵar aýdanyna qarasty Qarabulaq aýylynyń №22 jalpy bilim beretin orta mektebiniń túlegi. Aýyldyń qarapaıym, qara domalaq balasy.

«Men qarapaıym otbasynan shyqqan balamyn. Anam bastaýysh synyp muǵalimi, ákem ınjener. Otbasynda 2 balamyz. Bıyl altynshy synypty úzdik aıaqtaǵan qaryndasym bar»,- deıdi Jannur.

Aıtýynsha, tańdaǵan páni - ınformatıka jáne matematıka. Ol testileýge daıyndyǵyn 10-synaptan bastaǵan.

«Meni túrli tehnıkalar qatty qyzyqtyrady. Sonymen qatar esep shyǵarǵandy jaqsy kórem. Qańtar aıyndaǵy alǵashqy UBT-dan 121 ball jınadym, Naýryzda 137 ball aldym. Alaıda, bularǵa grant joq. Jazdaǵy UBT-nyń ekeýin de paıdalandym. Birinshisinde 132 aldym. Ekinshisinde, ⁠140 maksımaldy ball jınadym. Endi qujatymdy SDU ýnıversıtetine tapsyramyn. Bolashaqta Aqparattyq-tehnologııalar» IT mamany bolǵym keledi»,- deıdi túlek.

Ol UBT nátıjesin kórgeninde kózinen jas shyǵyp ketkenin jasyrmady.

«Alǵash nátıjemdi kórgende ornymnan ushyp turdym. Kózimnen jas shyǵyp ketti. Keýdemdi qorqynysh bıledi. Dese de daıyndyǵym júıeli boldy. Bir kúnimdi bos jibermeı oqyp, eńbektendim. Eki jyl boıy kún saıyn 8 saǵatymdy UBT-ǵa arnadym »,- dedi 140 ball ıegeri.

Aıtýynsha, bilim berý ortalyǵynda onlaın daıyndalǵan.

«Men úshin Juz40 bilim berý ortalyǵynyń jyl basynda ýáde etken Hyundai Sonato avtokóligi úlken motıvatsııa boldy. Buıyrsa, atalǵan ortalyq ekinshi shilde kúni mashınany tabystaıdy. Kólikti ákeme syılaımyn»,- deıdi ol.

⁠Altyn belgi ıegeri, UBT tapsyryp jatqan qatarlastaryna sáttilik tiledi.

«UBT tapsyratyndarǵa sáttilik tileımin, tek moraldyq turǵyda berilip qalmańdar degim keledi. Qoldaryńnan bári keledi»,- dep jigerlendirdi Jannur.

Osyǵan deıin Aýyl mektebiniń túlegi UBT-da barlyq suraqqa durys jaýap bergeni týraly jazǵan edik.

Esterińizge sala ketsek, sońǵy ret UBT nátıjesi boıynsha 140 baldy Pavlodar oblysynyń talapkeri 2021 jyly jınaǵan bolatyn, al 2018 jyly Almaty qalasynyń talapkeri jınady.

QR Ǵylym jáne joǵary bilim mınıstrliginiń málimetinshe, negizgi UBT bastalǵannan beri 264 myń ret test tapsyryldy. Onyń ishinde talapkerlerdiń 75%-y qazaq tilinde, 25%-y orys tilinde, 197 adam aǵylshyn tilinde testileýden ótti.

UBT bastalǵaly shekti baldy 77% talapker jınady. Ortasha balǵa keletin bolsaq, ol 69 baldy qurady.

Erekshe bilim berý qajettilikteri bar oqýǵa túsýshiler úshin qolaıly jaǵdaı jasaýdyń arqasynda UBT-ǵa alty aptanyń ishinde 620 talapker qatysty.

Aıta ketsek, 2024 jylǵy UBT aıaqtalǵannan keıin kúntizbelik jyldyń 31 qazanyna deıin testileýdiń beınejazbalaryna taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda túsýshiniń UBT nátıjeleri joıylady.