Otyrarda zııandy qaldyq jerge tógilgen, kompanııa jaýapqa tartyldy
TÚRKІSTAN. KAZINFORM – Túrkistan oblysy Otyrar aýdanyndaǵy óndiris oshaǵyndaǵy jerdiń kúkirt qyshqylymen lastanǵany anyqtaldy. Bul týraly qoǵam belsendisi Dáýren Aqsaqalov áleýmettik jelide jazba jarııalap, dabyl qaqty.
«Zııandy qaldyqtardy beıbereket tógý, topyraq astyna kóme salý bul Otyrar aýdany halqyna qasaqana jasalyp jatqan bıologııalyq shabýyl dep bilemiz. Beınematerıalda tógilgen qaldyqty ishken janýardyń ólgeni, ony súırep alysqa tastaǵany týraly aıǵaqtar anyq kórsetilgen. Qanshama sharýa osy jerden sý iship ólgen malyn izdep, qasqyr men urydan kórip sharasyz qalǵan shyǵar. Maldyń ózi iship sespeı qatyp jatqan bul qaldyqtardyń adam densaýlyǵyna orasan zalal keltireri, aýrý týdyrary anyq emes pe?» - dep jazdy áleýmettik jelide Dáýren Aqsaqalov.
Atalǵan jaǵdaı boıynsha Túrkistan oblysy boıynsha ekologııa departamentiniń tarapynan «Zarechnoe» BK AQ-nyń qyzmetine qatysty tekserý jumystary júrgizildi. Nátıjesinde «Zarechnoe» BK AQ-na tıesili óndiristik aýmaqta jerdiń kúkirt qyshqylymen lastanǵany anyqtaldy.
«QR Ekologııa Kodeksiniń 238-baby talaptarynyń saqtalmaýyna jol bergeni boıynsha Ákimshilik quqyq buzýshylyq týraly Kodekstiń (budan ári -ÁQBtK) 337 babnyń 4 tarmaǵyna sáıkes ákimshilik quqyq buzýshylyq týraly hattama toltyrylyp, lastanǵan jerlerdi tolyqtaı tazalaý, qalpyna keltirýge baǵyttalǵan remedıatsııa baǵdarlamasyn ázirlep, departamentpen bekitý týraly nusqama berildi. Odan bólek, ÁQBtK-niń 337 baby 4 tarmaǵyna sáıkes toltyrylǵan ákimshilik hattama QR Qylmystyq Kodeksiniń 332 babyna sáıkes jerdi ekologııalyq zalal keltirýge alyp kelgen qaýipti hımııalyq zattarmen lastaýdyń qylmystyq jazalanatyn is-áreketteri bar-joǵyn anyqtaý maqsatynda, joǵaryda atalǵan tulǵaǵa qatysty is-qujattary Otyrar aýdandyq polıtsııa bólimine joldandy»- delingen Túrkistan oblysy boıynsha ekologııa departamenti usynǵan aqparatta.
QR Ekologııa kodeksiniń 344-babynyń 2-tarmaǵyna sáıkes qaýipti qaldyqtardy jınaqtaýǵa nemese kómýge bólingen aýmaqta olardy basqarýǵa baılanysty emes qyzmettiń basqa da túrlerin júzege asyrýǵa tyıym salynady delingen. Tekserý jumystarynyń barysynda «Zarechnoe» BK AQ-myna tıesili óndiristik aýmaqta qyshqyldanǵan qaýipti qaldyqtardy, osy kodeksiniń 335 babymen qarastyrylǵan qaldyqtardy basqarý baǵdarlamasynyń talaptaryna sáıkes oryndamaı, bólingen aýmaqtan tys jerde qaldyqtardy jınap qoıǵany anyqtalǵan. Osyǵan oraı «Zarechnoe» BK AQ-ǵa ÁQBtK-tiń 344-baby 4-tarmaǵy boıynsha, ıaǵnı qaldyqtardy basqarý baǵdarlamasy talaptarynyń oryndamaǵany boıynsha ákimshilik shara qoldanyldy.
«QR Ekologııa kodeksiniń 211-babyna sáıkes І jáne ІІ sanattaǵy obektilerde avarııalyq jaǵdaı týyndap, sonyń saldarynan belgilengen ekologııalyq normatıvtertiń buzylýy oryn alǵan nemese oryn alýy múmkin bolǵan kezde obektiniń operatory keıinge qaldyrmaı, avarııalyq jaǵdaı anyqtalǵan kezden bastap eki saǵattan aspaıtyn merzimde bul týraly qorshaǵan ortany qorǵaý salasyndaǵy ýákiletti organǵa habarlaýǵa mindetti. Alaıda «Zarechnoe» BK AQ tarapynan kúkirt qyshqyly tasymaldanatyn qubyrlardyń jarylý saldarynan jerdiń lastanýy jaıly qorshaǵan ortany qorǵaý salasyndaǵy ýákiletti organǵa habarlama joldanbaǵan. Osyǵan oraı «Zarechnoe» BK AQ ákimshilik jaýapkershilikke tartyldy» - dep tolyqtyrdy departament.
Atalǵan jaǵdaı boıynsha «Qazatomónerkásip» UAK» AQ Túrkistan oblysynyń Otyrar aýdanynda ornalasqan «ZAREChNOE» BK» AQ enshiles kásipornynyń kenishine baspasóz týryn uıymdastyrdy. Іs-sharany ótkizýge áleýmettik jelilerde taratylǵan beınematerıaldar sebep bolǵan.
«Óz qyzmetiniń ashyqtyǵy men eseptiligin qamtamasyz etetin kásiporyn qaýipsizdik pen qorshaǵan ortany qorǵaýdyń joǵary standarttaryn saqtaı otyryp, ýran óndiredi. Zańnama talaptaryna sáıkes, ken ornyndaǵy jumystar aıaqtalǵannan keıin ýchaske memleketke bastapqy túrinde qaıtarylady, ony arnaıy komıssııa rastaıdy. Budan basqa, zańnamanyń talaby boıynsha Qazatomónerkásip kásiporyndarynda taratý qorlary qurylǵan, onda jumystar aıaqtalǵannan keıin aýmaqty qalpyna keltirý jáne tolyq qalpyna keltirý úshin qarjy jınaqtalady», - dedi «Qazatomónerkásip» UAK» AQ óndiristik qaýipsizdik departamentiniń dırektory Manas Ysqaqov.
Sondaı-aq, ol búkil kásiporyndarda ishki qyzmettik terserý taǵaıyndalǵanyn jetkizdi. Sonyń nátıjesinde ýran óndirýshi kompanııa naqty shara qabyldaıtyn bolady.
