Otyrarda egistik egýge kelgender qorymdy qıratyp ketken
TÚRKІSTAN. KAZINFORM- Egistik alqabynda adam súıekteri shashylyp jatyr.

Áleýmettik jelide taraǵan vıdeodan er adamnyń kósheden jatqan súıekterdi vıdeoǵa túsirip júrgenin kórýge bolady. Ol maqta egýge kelgender qorymdy qıratyp ketkenin aıtqan. «Mynaý bas súıek, qabyrǵa, jambas» dep shashylyp jatqan súıekterdi kórsetken turǵyn ata-baba arýaǵynyń rızalyǵy úshin súıekterdi jınap jatqanyn jetkizedi.
Atalǵan jaǵdaıǵa qatysty pikir bildirgen Túrkistan oblysy ákimdiginiń baspasóz qyzmeti oqıǵanyń Otyrar aýdanynda bolǵanyn aıtty.
- Otyrar aýdanyndaǵy «Tań-Sholpan» óndiristik kooperatıviniń aýmaǵynda aýyl sharýashylyq maqsatyndaǵy jerlerin kóktemgi dala jumystaryna daıyndaý barysynda bolǵan. Jer bederi birkelki tegis bolǵany anyqtaldy. Sonymen qatar qorym nemese adam jerlengeni týraly eshqandaı da belgi ornatylmaǵan,-delingen aqparatta.
Sondaı-aq, ákimdiktiń baspasóz qyzmeti aýdan ákimdigi janynan jumysshy top qurylǵanyn jetkizdi.
- Jer paıdalanýshy tarapynan atalǵan orynda musylmandyq rásimmen jerlenip, belgi qoıylyp jáne qorshaý jumystary tolyq júrgizilip bitkendigin habarlaımyz. Din ókilderiniń málimetinshe, Sharıǵat boıynsha qabirstannyń ishine qoıylǵan eń sońǵy adamnyń beıitine 40 jyl ótkennen keıin mazaratty súrip tastap, ornyna qurylys jumystaryn júrgizýge bolady. Al qurylys alańdarynda júrgiziletin qazba jumystary kezinde adam súıekteri tabylyp jatsa, ol súıekter aq mataǵa oralyp, basqa jerge kómiledi, - delingen aqparatta.
Aıta keteıik, budan buryn Túrkistanda zańsyz salynǵan 14 ǵımarat sot sheshimimen buzylǵanyn jazǵan bolatynbyz.